植物王國

媽咪話只要種多啲樹，樹王國就會畀張入場券你入去睇下佢哋嘅世界。媽咪話入面有好多識行嘅樹，啲河水仲識唱歌，周圍都充滿歡笑聲。我細細個就聽到入晒迷，如果我爬上一

樖識行嘅樹，噉佢咪可以帶我周圍去？哈哈，人哋騎馬，我就騎樹，諗起都興奮 ……

所以，由四歲開始，我每年生日都會叫姐姐帶我去種一樖樹。一樖、兩樖、三樖 ……去到今年終於要種第九樖喇！

我一朝早就拉埋姐姐去後山種樹，我哋掘窿、埋樹苗、平土 …… 我對手好似裝咗摩打噉嘭嘭聲做晒啲嘢，最後用力扤實啲泥土 —— 第九樖樹苗終於種好喇！

我左望望，右望望，又望下天，又望下地。咩事都冇發生。我又踩下啲泥，唔通唔夠平？冇喎，周圍咩事都冇。我頭耷耷噉返屋企，一日、兩日、三日 …… 成個月都冇事發生。

唔通媽咪只係想我種多啲樹？

又一年過去。喺我生日嘅前一晚，我準備瞓覺嘅時候，突然聽到後面有咯咯嘅敲窗聲。我擰轉頭，咩都冇。可能係聽錯？

咯咯。又有兩下。

今次我行埋去睇真啲 ——唔通有雀仔？定係太大風，有雜物撞到窗？

都唔係，我見到一塊樹葉，一塊黃黃藍藍嘅枯葉。我拎喺手，忽然塊葉講嘢：「求下你，救下我哋，我哋就快要亡國喇！」

我嚇一嚇，仔細一睇，原來塊葉係有眼耳口鼻，仲有手手腳腳！我即刻諗起媽咪講過嘅樹王國，就話：「你哋係樹王國？發生咩事啊？有咩我可以幫手？」

「樹王國？唔係啊，我哋係植物王國，快啲嚟啦，冇時間喇！」

樹葉人仔細細，但好大力，佢一掹，我就向前飛，仲要飛得超快，快到咩都望唔到。當我企返穩嘅時候，我已經喺一個幾乎俾藍色淹沒嘅世界。

「呢度係植物王國？我以為應該係多啲綠色，至少唔應該係藍色？」我話。

喺植物王國入面，唔單止全部路人嘅衫褲係藍色，就連地板、建築全部都係藍色！

葉仔好慘噉話：「唉，人類世界越嚟越少大樹，連帶我哋植物王國都受影響，大家越嚟越唔開心，慢慢所有嘢都變晒做唔開心嘅藍色 ……」

「噉我有咩可以幫到你哋？你帶我嚟一定有原因！」

「我留意咗你好耐，知道你係一個好愛大自然嘅人，每年都會種樹。」葉仔拉住我不斷行：「只要你同我哋國王講，呢個世界仲有人類係愛大自然嘅，國王一定會對人類有返信心，大家都會開心返！」

話咁快，葉仔就帶我嚟到國王面前。國王連鬍鬚都係藍色嘅，成堂眉都垂晒落嚟，睇落好似隨時都會喊噉。

「人類，你嚟做咩呀？」國王好虛弱噉講。

「國王，你好。我聽講你對人類冇晒信心，不過其實有唔少人都仲好鍾意大自然，好努力噉保護你哋！就好似我噉，我自四歲開始，每年都會種一樖樹，聽日就係第十年喇！」

國王呢個時候先抬起頭，佢望住我話：「不過你一個人嘅力量咁少，得嗰十樖樹有咩用啊？」

「人類嘅力量貴在可以互相感染，每個人十樖十樖噉種，數量唔可以睇小 ……」

聽完我呢番話，國王慢慢由藍色變成綠色 ——佢見到希望喇！成個國家嘅藍色都即刻換返做唔同嘅顏色！

葉仔開心到跳跳紥紥噉帶我喺王國周圍行，我哋去睇植物市集、花花雜技、拔草大賽 …… 哇，原來植物王國有咁多嘢玩！

正當我行得越嚟越興奮，突然有一粒石仔撠到我向前一仆 ——

咯咯。

我擘大眼，望到俾風吹咗兩下嘅玻璃窗，窗邊有一塊綠葉。我拎喺手，笑咗笑。我又點會唔記得今日係種樹嘅大日子呢？

Hambaanglaang - Level 5, 植物 王國