選班長

今日，王老師叫我哋選班長。王老師係我哋嘅班主任，都係學校嘅新老師。我覺得同其他老師相比，王老師好特別 ——佢講嘢好温柔，好好人又成日笑。而且，佢選班長嘅方式都好唔同。

以前，老師都會喺開學之後就即刻揀班長。老師通常會按照上個學期同學嘅成績，揀成績最好嘅同學做班長。不過，而家我哋已經開咗學一個月，王老師先話要選班長。王老師話，想大家相處一段時間，互相了解之後先選。而且，班長唔係由王老師揀，而係由班上同學一人一票選出。

王老師話，班長係班嘅代表，除咗負責幫老師維持課堂秩序，仲要幫助同服務同學。例如，幫手點名、派午飯、收功課，如果有同學唔舒服就要陪佢去休息室。因為班長嘅職責多，所以班長會得到一個優點獎勵。之後，王老師就叫想做班長嘅同學舉手。

「我要做！」好快就有兩個同學舉手，佢哋分別係小明同家家。其實佢哋喺之前嘅學期都俾老師揀過做班長，之不過同學仔唔鍾意佢哋。

小明成績好好，但除咗讀書之外，其他嘢乜都唔會理。每逢小息，佢都掛住做功課同温書，好少同其他同學玩同傾計。放學之後，佢就即刻去補習，唔會參加課外活動。有一次，有同學喺佢面前跌低，跌到隻腳損晒，但係身為班長嘅小明竟然唔扶佢起身，仲話要去温書唔得閒照顧佢。自此之後，同學都覺得小明淨係掛住温書唔理人。

至於家家，佢成日請同學食嘢。家家每日都帶好多零食返嚟，派畀同學食。佢話如果收咗佢嘅零食，就要同佢做朋友，聽晒佢話。有次放學突然落大雨，家家冇帶遮，就同一位經常收佢零食嘅同學講：「你成日食我送啲嘢，今次輪到你幫我喇！」之後一手拎咗人哋把遮走，留低個同學喺學校等雨停。後嚟家家做咗班長，就成日向同學講：「我係班長，老師要我維持課堂秩序，你哋要聽我話！」於是，佢不停叫同學幫佢拎嘢，又叫人代佢擦黑板同清潔課室。曾經有位同學，覺得佢冇盡班長責任而唔聽佢命令，家家就喺收功課嘅時候，專登收埋佢份功課，然後向老師講大話，話佢唔肯交功課，要老師罰佢。

王老師問佢哋點解想做班長。小明話：「因為做班長可以拎優點，拎到優點，我嘅成績排名就會更高！」而家家就話：「做班長好勁，可以令同學聽晒自己話！」

王老師聽完之後就擰擰頭，再問大家仲有冇人想做班長。同學仔你眼望我眼，大家都唔講嘢。喺呢個時候，我舉起手 ——不過我唔係話自己想做班長，而係想推薦心兒做班長。心兒雖然成績唔算好好，又唔會成日請同學食嘢，不過佢好鍾意幫人。嗰位喺小明面前跌傷嘅同學，就係由佢扶去休息室；俾家家拎咗把遮嘅同學，最後亦因為心兒借把遮畀佢，佢先唔使等到冇雨先走。最後嗰位俾家家誣衊佢冇做功課嘅同學，都因為心兒見到家家收埋佢份功課，先唔使俾老師罰 ……點解我會知咁多？因為呢三個受到幫助嘅同學，全部都係我！

老師聽完我嘅建議，就問心兒想唔想做班長。

「如果可以幫到大家嘅話，我願意！」

心兒一講完呢句，班上即刻掌聲雷動。睇嚟受過心兒幫助嘅人唔只我一個。

最後，老師叫大家投票。結果幾乎全班都投心兒一票，佢就成為咗我哋嘅班長喇！我相信，佢一定會係個好班長！

Hambaanglaang - Level 5, 選 班長

選 班長

Hambaanglaang - Level 5, 選班長

選班長