太細個喇！

「你太細個喇！」

呢句話，我成日聽到。爸爸媽媽因為我太細，好多嘢都唔准我做。例如，唔可以自己一個出街、唔可以夜瞓、唔可以飲咖啡等等。我問佢哋，點解我年紀細就唔可以做呢啲，佢哋話我大個就會明。

試過有一次，我睇住媽媽煮飯。我望住佢點樣拎刀切瓜，我都好想試下。我覺得如果我學識煮飯，就可以幫媽媽手，等佢唔使咁辛苦。

不過佢話：「你太細個喇！拎刀好危險！」唔畀我學。

直到有一日，媽媽掛住做嘢，冇返屋企煮飯畀我同家姐食。我同家姐都好肚餓，但又唔識嗌外賣，唔知點算好。於是我自告奮勇下廚煮嘢食。我好似媽媽平時噉煮飯煲湯，順利煮好呢餐飯。我同家姐終於有飯食，家姐仲讚我煮得好味。

媽媽返到屋企，見我同家姐食緊飯，佢好意外，問我哋啲嘢食係邊個煮。我好興奮噉應頭，以為媽媽一定會讚我，點知媽媽皺起眉頭話：「你太細個喇！唔好有下次！」

又有一次，爸爸裝修屋企。不過佢髹油髹得好慢，啲顏色仲要東一忽西一忽，好難睇。於是我決定幫佢髹油。結果，牆上嘅顏色係好睇咗好多，但我就唔小心整到成身都係油。唔緊要啦，最緊要係啲顏色髹得靚呀嘛！

我以為爸爸見到之後一定會讚我，點知結果同上次一樣，我又俾人鬧喇。雖然我幫咗佢，仲整到自己成身都係油，但佢反而鬧我：「你太細個喇！唔好咁多事！」

我好唔開心，點解我明明幫咗佢哋，佢哋都係鬧我？我之所以做呢啲事，就係因為大人冇做好應份嘅事，甚至連做都冇做。唔通我噉都有錯？噉究竟我有啲咩係可以做㗎呢？定係，因為我太細個，所以就乜都唔做得？

上星期，我同家姐帶貓仔去公園玩。玩玩下，貓仔竟然爬咗上樹，唔識落返嚟。咁啱家姐顧住踩單車，冇發現到；附近又冇大人，我揾唔到人幫手。貓仔喺樹上面好驚，攬到棵樹實一實。我試過安慰貓仔，等佢冇咁驚就可以慢慢爬返落嚟。可惜無論我講啲咩，佢都仲係咁驚。

如果貓仔繼續留喺樹上面，我怕佢會有危險。所以我決定爬上去，救佢落嚟！好彩，棵樹都唔算好高，我順利抱返佢落嚟，總算有驚無險。

我帶貓仔去揾返家姐，家姐一直掛住踩單車，完全唔知發生咩事。當我講返件事畀佢聽嘅時候，個心仲諗：唔知家姐會唔會好似爸爸媽媽噉，話我太細個，唔應該噉做呢？點知 ——

「嘩！好彩有你，貓仔至冇事咋！你做得好好呀！」

聽到家姐呢句話，我好開心！終於有人認同我做嘅嘢喇！

家姐將件事講咗畀爸爸媽媽聽。佢哋聽到之後，抱起我讚我叻。我趁機問佢哋：「係咪我細個，所以好多嘢都唔做得？」

媽媽答：「一個行為啱定唔啱，唔關年紀事。如果你係為咗幫人，又唔會傷害到自己或者其他人，就可以去做。」

爸爸又話：「係呀，所以除咗睇對錯，仲要睇能力。而能力多多少少係同年紀掛勾嘅 —— 所以有啲嘢，爸爸媽媽唔畀你做，主要都係因為我哋擔心你能力未夠，夾硬去做反而整傷自己。」

聽完佢哋噉講，我先明白自己之前一直誤解咗爸爸媽媽嘅苦心 ……

「不過，我哋都應該適時放手畀你去學習同探索嘅 ……」媽媽有啲感觸。」

我即時兩眼發光，大聲承諾：「我以後做啲咩危險嘢，都一定會揾大人在場睇住，唔會有事㗎！

「唉，真係無你辦法！」爸爸媽媽笑住話。

Hambaanglaang - Level 5, 太 細個 喇 ！