時間 ，你 去 咗 邊 ？

「樂樂 ，快 啲 刷牙 瞓覺 喇 ，好 夜 喇 ！」 媽媽 係 噉 催 我 。

「媽媽 ，我 仲未 想 瞓 住 呀 ！」 我 見到 個 鐘 長針 指住 6 ，短針 指住 9 同 10 中間 ，即 係 九點半 啫 ，我 仲 想 繼續 玩 飛行棋 呀 ——

「聽日 去 迪士尼 樂園 再 玩 過 啦 ！」 話口 未 完 ，媽媽 就 入 房 拉 咗 我 去 廁所 刷牙 ……

明明 放學 嗰 陣 個 鐘 仲 係 指住 4 ，點解 眨下 眼 就 九點半 ？ 時間 ，你 去 咗 邊 呀 ？

不過 聽日 去 迪士尼 ，一定 好 好玩 ，我 要 快 啲 瞓覺 ！

「樂樂 ，好 起身 啦 ！ 媽媽 蒸 咗 你 最 鍾 意 食 嘅 燒賣 做 早餐 呀 ！」

我 捽 眼 望望 個 鐘 ， 又 係 九點半 ， 兩 支 指針 睇 落 好似 冇 郁 過 ， 但 其實 個 天 已經 光 晒 。

我 望住 個 鐘 ，望 到 頭 都 側埋 ，覺得 時間 呢樣 嘢 真 係 好 神奇 。

媽媽 好似 知 我 諗 咩 噉 望住 我 笑 ：「傻豬 ，支 時針 係 行 完 一 圈 走 返 原點 ，但 係 喺 現實 世界 已經 過 咗 十二 個 鐘 ——所以 而家 已經 係 朝早 九點半 喇 ！ 仲 唔 快啲 起身 刷牙 食 早餐 ！」

時針 走 一 圈 就 過 咗 十二 個 鐘 ？ 時間 ，你 去 咗 邊 呀 ？

搭車 去 迪士尼 嗰 陣 ，我 打醒 十二分 精神 望住 我 隻 錶 ——我 要 𥄫 實 支 時針 唔 畀 佢 走 得 咁 快 ，等 我 可以 玩 耐 啲 ！

我 望 呀 望 ， 望 呀 望 —— 好 慢 呀 ， 佢 好似 冇 郁 過 噉 ！

望 下 望 下 ， 我 覺得 眼皮 越 嚟 越 重 ， 最後 一 片 漆黑 ……

到 我 再 擘 大 眼 嗰 陣 ，支 時針 已經 唔 經唔覺 行 咗 一 大 步 ！

時間 ，你 去 咗 邊 呀 ？

「仲 望 手錶 ？ 我哋 到咗 喇 ，快啲 去 玩 啦 ！ 」媽媽 又 催 我 喇 。

最後 我 玩 咗 旋轉 木馬 、 Winnie the Pooh 、 小飛象 …… 我 玩 得 太 開心 喇 ， 開心 到 完全 唔 記得 要 望 錶 ！

反而 媽媽 比 我 勤力 ，佢 望 錶 ：「咦 ，乜 兩點 嗱 ，我哋 食 啲 嘢 先 繼續 玩 啦 。」

吓 ？！ 乜 時間 過 得 咁 快 嘅 ！

「媽媽 ，點解 時間 會 過得 咁 快 ，佢 去 咗 邊 ？ 佢 係 咪 俾 鐘錶 啲 指針 妖怪 食 咗 ？」 我 忍唔住 一輪 嘴 將 我 嘅 煩惱 同 猜測 話 晒 畀 媽媽 聽 ……

媽媽 聽 完 先 係 呆 一 呆 ，然後 笑 到 見牙 唔 見 眼 ：「嘩 哈哈哈 ，傻豬 ，你 諗 咗 去 邊 呀 ？ 鐘錶 係 我 哋 用 嚟 睇 時間 嘅 工具 嚟 ， 有 啲 唔 準 嘅 ， 會 行 得 快 咗 或 慢 咗 。 但 真正 嘅 時間 係 一分一秒 噉 流逝 ，唔 會 話 走得 快 咗 或 慢 咗 。 時間 過 得 快 或 慢 ，係 人 嘅 主觀 感覺 嚟 。」

媽媽 停 咗 停 ，稍為 收起 笑容 再 開口 ：「不過 有 樣 嘢 你 講 得 啱 ，就 係 時間 係 一去不復返 嘅 ，挽留 唔 到 亦 揾 唔 返 ——我 哋 唯一 可以 做 嘅 ，就 係 好好 珍惜 當下 ，唔 好 虛度 光陰 。」

我 似明 非明 噉 望住 媽媽 ，佢 就 話 ：「就 好似 我 哋 今日 嚟到 迪士尼 ，你 會 希望 點樣 度過 喺 呢度 嘅 時間 ？」

「我 希望 同 媽媽 開開心心 噉 過 ！」 我 諗 都 唔 諗 就 脫口而出 。

媽媽 語 帶 安慰 噉 話 ：「係 哩 ？ 但 係 你 掛住 睇 手錶 嘅 話 ，就 會 錯過 晒 啲 美好 時光 㗎 喇 ！」

「噉 ……冇 咩 事 我 都 係 返去 繼續 玩 喇 ！」 我 一支 箭 噉 跑走 ——天底下 竟然 有 咁 正 嘅 時光 ，我 當然 要 好好 把握 啦 ，嘻嘻 ！