冇人信我

其實，我好鍾意返學！因為返學可以睇好多書，又有好多文具可以用。而且學校好大，有好多課室畀唔同課堂用，例如我可以去音樂室學唱歌，去視藝室學畫畫，去電腦室學上網，去操場做運動 …… 每一個角落都有好多嘢學，我好鍾意日日去唔同課室上堂！

喺咁多地方之中，我最鍾意就係圖書館喇！因為呢度有好多書，我可以不停睇圖書：小說、漫畫、雜誌、繪本、教科書，唔同類型嘅書都應有盡有！每次嚟到圖書館，我都唔想離開。學校入面有咁多嘢玩，又有咁多嘢學，我真係好鍾意返學！

雖然我好鍾意學校，但學校啲人似乎唔係咁鍾意我。啲同學個個都話我係「書蟲」，成日睇書，講嘢又好似毛毛蟲爬下爬下噉咁慢。我同佢哋講，睇書好開心，喺書入面可以識到好多朋友，但冇人信我，冇人肯同我一齊玩。

有一日，我見到同學喺花園玩。我諗住行埋去問佢哋可唔可以摻埋我玩，有一日，我見到同學喺花園玩。我諗住行埋去問佢哋可唔可以摻埋我玩，「我、我真係好想同、同你哋一齊玩、玩啊！」但係佢哋笑住話：「你同你啲書朋友玩啦！」然後就唔再睬我。最後，我只好自己一個孤零零噉走開。

從此以後，我唔敢再同同學講嘢。我知道，佢哋唔會信我講嘅嘢。後嚟，我成日去池塘邊，同入面啲魚仔講嘢。我知道，魚仔唔會唔聽我講嘢，而且佢哋會相信我。同啲魚仔熟咗之後，我發現入面有一條魚同我好似。

我唔知道佢屬於咩魚類，但就覺得佢同其他魚好唔同 —— 佢係成個池塘入面唯一一條紅色魚，而且每條魚都會同埋佢哋嘅同伴一齊游，唯獨佢永遠都自己一個游。佢喺池塘入面好似冇朋友冇同伴，同我喺學校嘅情況一樣。所以我同佢真係好似。不過，呢件事我冇同任何人講過。因為我知道冇人會信我。

同學唔信我，冇同學肯同我一齊玩。老師見我答問題答到一嚿嚿，唔信我温過書，成日鬧我。屋企人都唔信我，以為我掛住睇故事書唔温書，唔同我講嘢。冇人信我，所以我唔再同其他人講嘢。

不過，我都有唔少朋友。除咗池塘啲魚仔，我仲有好多玩具。佢哋會同我傾偈，同我一齊玩。好彩有佢哋，我先唔使咁悶咋！

有時，我鍾意透過畫畫，畫啲朋友出嚟陪我。所以，我成日喺我啲功課同課本上面畫畫。老師見到，會叫我唔好畫花啲書同功課。我同佢講呢啲係我嘅朋友，佢唔單只唔信我，仲罰我。我好唔開心，除咗因為老師唔准我畫畫之外，仲因為我唔可以畫啲朋友出嚟陪我上堂。

我去到池塘邊，諗住將呢件事話畀魚仔聽 —— 點知畀我見到件好恐怖嘅事！我見到同班同學－明仔俾人推到池塘邊，明仔不斷喊住大叫「唔好」，但啲人冇放過佢，仲一手推佢落池塘！好彩池水唔算好深，有老師聽到叫聲之後趕到，救起咗佢。不過推佢落水嘅人已經走咗，現場得返我一個 ……

老師帶咗我去校務處，明仔換咗件乾爽校服之後都入埋嚟。老師問明仔係咪俾人推落水，明仔頭耷耷噉答係，之後老師就一直睥住我 —— 佢認定係我推明仔落水。我不斷口窒窒噉話唔係我，但佢都係唔信。我只好合埋眼，唔再望老師。

「唔係佢推我嘅！」

呢個時候，明仔出聲，仲開始同老師講返事發經過。老師聽完，至冇再懷疑我。出咗校務處，我同明仔講多謝，點知佢同返我講多謝！究竟佢多謝我啲咩呢？

「多謝你肯同我講嘢 ……」

原來除咗我之外，明仔喺學校都冇朋友。之後我哋就成為咗好朋友。佢令我知道，原來學校仲有人係相信我，願意聽我講嘢 ……

Hambaanglaang - Level 5, 冇 人 信 我