河狸築巢記

河狸係一種可以用尖銳牙齒咬斷樹枝、喺河流起水壩居住嘅小動物。故事就發生喺一條平靜休閒嘅河流上面。

艾迦係呢條村裡面最年幼嘅河狸，由細到大，爸爸都教佢樂於助人嘅精神，因為噉，每當佢見到有人需要幫助，佢都會義不容辭去幫手。有一日，新鄰居波特為咗起水壩一事好煩惱，因為條河流咁大，以佢一個人嘅力量實在太困難喇。艾迦知道呢個情況，就好熱心噉去幫佢手。

艾迦：「不如等我幫你吖？」

波特：「嘩，真係？會唔會麻煩到你呀？」

艾迦：「唔會呀，爸爸話助人為快樂之本！幫到人，自己都會開心㗎嘛！」

波特見到艾迦咁熱心，都唔好意思拒絕，於是佢哋兩個一齊去森林入面揾樹枝。成個過程都好順利，喺波特同艾迦嘅互相配合下，波特嘅新屋好快就整好喇。波特亦都好熱情噉邀請艾迦一齊喺佢條河游水。佢哋游呀游，游呀游，歡樂嘅時光過得特別快，到佢哋終於識得攰，至挨住新起嘅水壩休息。點知發生咗件不幸嘅事 ……

艾迦挨住嗰個位嘅樹枝突然斷開，成個水壩都因為承托力唔夠而散開晒 ——波特嘅新屋就係噉，喺一日之內起好，但又喺一日之間消失 ……

望住自己新起嘅屋俾水沖走，波特非常唔開心，於是同艾迦游返去下游，執返晒啲樹枝，打算重新起過條水壩。

就喺呢個時候，波特喺下游發現頭先斷開嗰枝樹枝，呢枝樹枝又短又幼，根本唔適合拎嚟起水壩，而呢枝樹枝，正正係艾迦幫佢執返嚟嘅。於是佢好嬲噉捉住艾迦問：「呢枝嘢係咪你拎返嚟㗎？」

艾迦就答佢：「係呀，咩事？」

波特確認咗件事之後，即刻破口大罵：「就係因為你呢枝樹枝，個水壩先會冧咋！」

艾迦啞口無言。呢個時候，佢諗起爸爸嘅教導：做人只要誠心道歉，一定會得到對方原諒。於是艾迦同波特講：「對唔住呀，我唔知件事會搞成噉㗎 ……」

波特唔原諒艾迦，仲好嬲噉話以後都唔想再見到佢！傷心嘅艾迦強忍眼淚，不停游呀游，游呀游，終於返到屋企。

爸爸見到佢對眼紅晒，就問佢發生咩事。

滿肚委屈嘅艾迦就話：「爸爸，你又話道歉就會得到人原諒嘅？點解我同波特道歉，佢唔原諒我？」

爸爸聽完之後，靜咗一陣，然後好温柔噉望住艾迦，細細聲問佢：「嗱，你話畀爸爸聽成件事係點先。」

於是艾迦一五一十噉講俾爸爸聽。爸爸聽完，就同艾迦講：「艾迦，爸爸係咪教過你，做錯事要誠心向人道歉？」

艾迦：「係呀。」

爸爸：「噉你又知唔知，點解做錯事要道歉吖？」

艾迦聽完之後，成個人呆晒，因為佢從來冇諗過呢樣嘢。

爸爸見到艾迦滿臉疑惑，就繼續講：「道歉係因為你做錯事，帶咗麻煩畀對方。爸爸成日都同你講，道歉唔係一件羞恥嘅事，而係表現你係一個勇於承擔過錯嘅人，係咪？」

艾迦點點頭。

爸爸又繼續講：「之不過呢，道歉唔一定會得到對方原諒㗎喎。因為對方可能當下嘅情緒未平靜到落嚟，所以仍然好嬲你。而且道歉係有技巧㗎。你要令對方知道你做錯咩事，道歉嗰陣要望住對方，噉先有誠意㗎嘛！」

艾迦諗咗諗，恍然大悟。然後就話：「我知喇！就好似爸爸你成日同媽媽道歉一樣！如果你唔知自己做錯啲咩，媽媽就會繼續嬲你！」

爸爸好尷尬噉回應：「細聲少少，細聲少少 ……」

第二日，艾迦聽從爸爸嘅建議再去揾波特道歉，表明自己嘅誠意。而波特聽到之後都即刻冇再嬲，仲非常唔好意思噉承認自己尋日對艾迦太惡。經過呢件事之後，佢哋兩個比起初識嗰陣更老友，仲重建咗一個更堅固嘅水壩添！

Hambaanglaang - Level 5, 河狸 築 巢 記