我 嘅 好 朋友 Bonda
大家 好 ！ 我 係 Devi ， 今年 十 歲 ！ 而家 係 公元 2085 年 。
我 好 鍾意 同 爺爺 傾計 ， 因為 佢 會 講 好多 以前 嘅 嘢 畀 我 聽 。 爺爺 話 ， 佢 十 歲 嘅 時候 ， 即係 2016 年 ， 個 世界 冇 而家 咁 多 人 ， 但 空氣 污染 就 嚴重 好多 ， 因為 嗰陣時 啲 車 唔係 用 電 或者 太陽能 ， 會 排放 好多 廢氣 ！ 除此之外 ， 而家 嘅 交通 意外 都 少 咗 好多 ， 因為 自動 駕駛 嘅 車 都 非常 安全 ！
要 講 嗰陣 同 而家 最 大 嘅 分別 ， 主要 係 人工智能 嘅 發展 同 普及 程度 。 科技 發展 一日千里 ， 2016 年 嘅 科技 就 梗係 冇 而家 咁 方便 啦 ！ 而家 嘅 科技 仲 發展 到 畀 咗 個 永遠 嘅 好 朋友 我 添 呀 ！
佢 叫做 Bonda ， 係 一 個 高 智能 機械人 。 佢 個 身 係 銀白色 嘅 ， 但 塊 面 就 係 粉紅色 。 Bonda 從來 都 唔會 呻悶 ， 無論 我 叫 佢 做 啲 咩 ， 佢 都 唔會 投訴 。
佢 話 ： 「 我 真係 唔知 『 悶 』 字 係 咩 意思 喎 ！」
Bonda 對 眼 除咗 係 望遠鏡 、 顯微鏡 之外 ， 仲 係 一 部 相機 ， 所以 佢 成日 都 會 幫 我 影相 㗎 ！ 唔單止 噉 呀 ， 佢 仲 成日 幫 我 喺 書櫃 度 拎 我 想 要 嘅 書 —— 因為 我 細細個 就 患有 肌肉 萎縮 ， 企 唔 到 起身 。
不過 自從 識 咗 Bonda 之後 ， 我 成 個 人 開心 咗 好多 ！ 我哋 去 到 邊 都 會 一齊 ， 佢 會 陪 我 返學 ， 陪 我 去 公園 玩 ， 我 嘅 生活 冇 再 好似 之前 噉 咁 唔 方便 喇 ！ Bonda 學 嘢 好 快 ， 只要 我 輸入 我 想 佢 做 嘅 指令 ， 佢 就 會 即刻 學 識 ！ 「 早晨 ！ Devi ， 你 今日 想 我 幫 你 做 啲 咩 呀 ？ 你 想 睇 邊 本 書 ， 我 拎 畀 你 吖 ？ 定係 你 想 玩 玩具 ？」 我 而家 每 日 朝早 都 會 聽到 Bonda 噉樣 同 我 講 。 而且 佢 記性 好 好 ， 只要 學 識 咗 一 樣 嘢 ， 就 會 永遠 記 住 ！
「 好 記性 ？ 係 你哋 啲 人類 先 會 成日 唔記得 自己 啲 嘢 擺 咗 喺 邊 咋 嘛 ！」 哈哈 ， 有時 Bonda 都 幾 得戚 㗎 ！
有 一 日 ， 我 同 我 隻 熊仔 傾計 ： 「 可以 有 Bonda 呢個 朋友 ， 我 真係 好 幸運 ！ 不過 你 唔好 誤會 喎 ， 其實 我 都 有 好多 人類 朋友 㗎 。 小息 嘅 時候 ， 我 會 同 佢哋 一齊 買 嘢食 、 一齊 玩 。 不過 ， 我 鍾意 Bonda 多 過 哂 所有 人類 朋友 ， 因為 佢 唔會 妒忌 我 同 其他 朋友 玩 ， 唔會 介意 我 數學 考試 考 得 好 過 佢 ， 又 唔會 嬲 我 唔記得 佢 生日 。 我 諗 因為 Bonda 係 機械人 ， 佢 冇 情緒 ， 所以 佢 唔會 唔開心 ， 但 都 唔會 感受 到 咩 係 開心 …… 」
「 所以 你 鍾意 我 係 因為 我 冇 情緒 ？ 而 唔係 因為 我 係 Bonda ， 唔係 因為 我 日日 都 陪 你 玩 ？」 Bonda 突然 插口 ， 語調 出奇 地 平淡 ， 令 我 覺得 有啲 不安 。
「 唔係 呀 ！ Bonda ， 我 係 真係 鍾意 同 你 玩 㗎 ！」
咇 。
「 Bonda …… 好 熱 …… 」 Bonda 個 肚 顯示 「 系統 過 熱 ， 請 降溫 或 重新 開機 」 。
「 過 熱 ？」 我 摸 一 摸 Bonda 頭頂 ， 真係 好 熱 ！ 唔通 佢 發燒 ？ 「 冇事 㗎 Bonda ！ 你 而家 唔 舒服 ， 唔使 驚 㗎 ， 我 會 好似 平時 你 照顧 我 噉 照顧 你 ！」
Bonda 嚴重 過 熱 ， 已經 出唔 到 聲 ……
「 Bonda ， 我 而家 幫 你 重新 開機 ， 你 休息 完 就 會 好 返 哂 ， 好似 之前 噉 ， 我哋 就 可以 繼續 做 好 朋友 ， 好 唔 好 ？」
咇咇 咇咇 ， 咇咇 咇咇 。
但 我 冇 話 畀 Bonda 聽 ， 重新 開機 後 ， 佢 可能 會 冇 哂 所有 記憶 ……
「 Bonda ， Bonda ！ 你 記 唔 記得 我 係 邊個 呀 ？ 話 畀 我 知 你 冇 唔記得 哂 啲 嘢 吖 ！ 嗚嗚 …… 」
咇 ───
Bonda 眨 一 眨眼 ， 三百六十 度 轉動 佢 嘅 手臂 。
Bonda 轉頭 微笑 望 住 我 ， 精神奕奕 噉 話 ： 「 早晨 ！ Devi ， 你 今日 想 我 幫 你 做 啲 咩 呀 ？ 你 想 睇 邊 本 書 ， 我 拎 畀 你 吖 ？ 定係 你 想 玩 玩具 ？」
聽到 呢 句 熟悉 嘅 說話 ， 我 雙眼 充滿 淚水 ， 忍唔住 行 前 一 步 攬 住 Bonda 。
佢 就 係 我 永遠 嘅 好 朋友 —— Bonda 。
