古宅 心慌慌

傳說 某個 地方 有 一 間 古老 大屋 ， 大屋 入面 有 隻 專食 細路 嘅 惡鬼 。

某 日 ， 有 三 個 細路 喺 大屋 出面 打 板球 。

「 哎 吔 ！ 個 波 呀 ！ 」 家豪 一 唔 小心 ， 將 個 波 打 咗 入 大屋 嘅 花園 。

美怡 想 入去 執 返 個 波 ， 但 家豪 嗌 住 佢 。

「 唔 好 呀 ！ 你 冇 聽 過 咩 ？ 間 屋 入面 有 鬼 ， 專 食 小朋友 㗎 ！ 」 家豪 指 住 間 屋 ， 驚 驚 青青 噉 講 。

美怡 唔 係 好 信 ， 但 都 停 咗 喺 度 冇 再 入去 。

「 噉 而家 點算 好 呀 ？ 」 可盈 問 。

「 不如 我 哋 問 下 郵差 叔叔 吖 ？ 佢 好似 每 個 禮拜 都 會 去 送 信 ， 姿勢 好 純熟 ， 手腳 好 迅速 …… 」 家豪 建議 。

於是 ， 可盈 去 咗 揾 郵差 叔叔 。

「 叔叔 ， 請問 …… 請問 …… 街口 間 古老 大屋 係 咪 真 係 有 鬼 ？ 我 哋 想 入去 執 返 個 波 ， 但 聽講 入面 有 隻 鬼 ， 好 鍾 意 食 小朋友 ……」

郵差 笑 咗 笑 ， 細細 聲 同 可盈 講 ︰ 「 其實 ， 屋 入面 個 住客 ， 係 鍾 意 食 小朋友 …… 整 嘅 蛋糕 。 」 佢 講 完 再 笑 一 笑 ， 就 踩 單車 走 咗 ……

可盈 返 嚟 將 同 一 番 說話 講 畀 家豪 同 美怡 聽 ， 三 個 人 都 各 有 諗 法 。

「 我 哋 好 唔 好 整 個 蛋糕 送 入去 ？ 」 美怡 問 。

「 郵差 叔叔 會 唔 會 呃 我 哋 ， 想 我 哋 俾 鬼 食 ？ 」 家豪 好 認真 噉 講 。

「 如果 …… 如果 …… 佢 蛋糕 又 食 …… 小朋友 又 食 ， 噉 點算 好 ？ 不如 …… 唔 好 要 個 波 啦 ？ 」 可盈 想 喊 。

「 但 個 波 係 我 嘅 生日 禮物 嚟 …… 不如 噉 ， 我 哋 沓 正 中午 十二點 去 ， 爸爸 講 過 中午 陽氣 最 盛 ， 啲 鬼怪 法力 會 最 弱 ！ 」 美怡 大膽 提議 。

「 先旨 聲明 ， 就算 你 哋 唔 敢 去 ， 我 都 會 照 去 ！ 」 佢 補充 。

「 去 咪 去 ， 有 咩 好 驚 喎 。 呢 個 世界 邊 有 鬼 㗎 ！ 可盈 你 嚟 唔 嚟 ？ 你 唔 係 驚 呀 ？ 」 家豪 大 大聲 講 ， 似 係 為 自己 壯膽 。

「 你 哋 去 …… 我 就 去 ……」 可盈 細細 聲 噉 講 。

就 係 噉 ， 佢 哋 真 係 一齊 整 咗 個 蛋糕 ， 約定 禮拜六 中午 十二 點 ， 去 古老 大屋 ， 探險 ！

話 咁 快 嚟 到 禮拜六 。

「 叮噹 。」 佢 哋 嚟 到 大屋 門口 ， 撳 咗 一 下 鐘 。

「 叮噹 。」 都 係 冇 人 應門 。

「 叮噹 。」 突然 ， 大門 打開 ， 開門 嘅 係 一 個 老婆婆 。 家豪 嚇 到 褪 後 一 步 ， 可盈 就 匿 喺 家豪 身後 。

「 婆婆 ， 我 哋 整 咗 個 蛋糕 畀 你 呀 ！ 」 美怡 講完 後 ， 婆婆 望住 佢 哋 。 美怡 再 講 多 次 ， 婆婆 先 識得 「 咦 吚 哦 哦 」 噉 問 佢 哋 嚟 做 乜 。 呢 個 時候 ， 佢 哋 先 發現 婆婆 隻 耳仔 撞 聾 ， 唔 係 好 聽 到 嘢 ……

婆婆 見 佢 哋 咁 有心 整 咗 個 蛋糕 過 嚟 ， 就 請 佢 哋 入屋 。 啲 小朋友 知道 婆婆 隻 耳仔 唔 好 ， 就 特登 講 得 慢 啲 大聲 啲 ， 話 想 攞 返 個 板球 。

原來 婆婆 係 一 個 好 友善 嘅 人 ， 只 係 聽 嘢 唔 太 清楚 ， 所以 好 少 出 街 ， 亦 好 少 同 啲 街坊 傾 偈 。 啲 大人 見 婆婆 噉 ， 以為 婆婆 唔 鍾 意 俾 人 騷擾 ， 就 作 個 故仔 話 間 屋 有 鬼 ， 等 啲 小朋友 唔 好 去 打擾 佢 。

美怡 佢 哋 同 婆婆 傾 咗 好 耐 偈 ， 仲 一齊 食埋 蛋糕 先 走 。 婆婆 仲 話 歡迎 佢 哋 得閒 過 嚟 再 玩 過 添 。

之後 ， 逢親 佢 哋 打 咗 咩 板球 、 羽毛球 、 乒乓球 、 排球 或者 足球 入屋 ， 婆婆 都 會 執 返 畀 佢 哋 。 然後 每 個 禮拜六 中午 十二 點 ， 佢 哋 都 會 帶 住 蛋糕 去 古老 大屋 ， 探 婆婆 ！