法蒂瑪 同 月亮
Fatima 出世 嗰 陣 ， 係 一 個 滿月 嘅 夜晚 。 月亮 又 大 又 圓 ， 望 住 細細 粒 嘅 Fatima 。 Fatima 笑咪咪 ， 好 安靜 噉 瞓 緊 覺 。 柔和 嘅 月光 ， 輕輕 撫摸 Fatima 嘅 面珠 墩 。 佢 真 係 好 鍾 意 呢 個 小 生命 ， 係 咁 可愛 ， 咁 柔軟 ， 又 咁 靚 。
Fatima 喺 一 座 小島 出世 ， 呢 座 島 好 細 好 細 好 細 —— 喺 世界 地圖 入面 ， 佢 連 一 點 微塵 嘅 位置 都 冇 。 呢 座 島 就 好似 廣闊 海洋 中 嘅 一 塊 碎片 仔 ， 方圓 幾百 米 ， 除 咗 海水 、 海龜 同 魚 ， 就 咩 都 冇 。 佢 細 到 一 班 細路 仔 邊 跑 邊 玩 ， 只要 半 日 就 可以 繞 島 一 圈 ； 一 隻 啱 啱 起身 嘅 海龜 晨運 噉 游 ， 一 粒 鐘 就 可以 繞 一 圈 。
呢 座 島 就 係 咁 細 。 不過 對 年紀 仲 細 嘅 Fatima 嚟 講 ， 呢 個 島 好似 宇宙 咁 大 ， 每 日 都 會 有 新鮮事 發生 。 尋日 佢 先 發現 一 朵 完全 未 見 過 嘅 植物 ， 日頭 會 打開 晒 啲 葉 ， 夜晚 就 好似 蝦米 噉 捲 成 一 團 ； 今日 佢 就 喺 沙灘 揾 到 一 個 好 靚 嘅 大 貝殼 ， 喺 陽光 之下 會 閃出 七彩 光芒 ， 就 好似 有 條 彩虹 靜 雞雞 匿 咗 喺 入面 噉 。
不過 要 講到 Fatima 最 鍾 意 嘅 ， 一定 係 月光 下 嘅 大海 。 月亮 成日 會 講 大海 嘅 故事 畀 Fatima 聽 ， 可能 係 美人魚 嘅 歌聲 ， 又 可能 係 成 座 山 咁 大 嘅 鯨魚 …… 每 一 個 故事 ， 都 聽 到 Fatima 好 入神 。 大海 係 幾 咁 神秘 ， 入面 又 有 幾 咁 多 得意 嘅 事 ！
「 月亮 、 月亮 ， 我 幾時 先 可以 去 大海 睇 下 呀 ？」 Fatima 成日 追問 月亮 ， 因為 佢 年紀 實在 太 細 ， 爸爸 媽媽 唔 畀 佢 去 游水 住 。
「 等 你 大個 啲 ， 明白 大海 有 好 嘅 一 面 、 亦 有 衰 嘅 一 面 嗰 陣 。 」 月亮 每 次 都 噉 答 。
Fatima 有時 瞓 唔 著 ， 就 會 諗 ： 「 究竟 幾時 先 係 大個 啲 呢 ？ 去 到 媽媽 條 腰 咁 高 ？ 定 係 夠 力 拎 得 起 一 隻 大 螺 ？ 而且 大海 咁 好 ， 又 點 可能 會 係 衰 ？」
終於 ，當 Fatima 學 識 整 出 全 島 最 靚 嘅 花圈 ，媽媽 就 教 佢 游水 ，仲 送 咗 個 潛水鏡 畀 佢 。 大家 都 話 Fatima 上 世 一定 係 條 好 可愛 嘅 美人魚 ， 如果 唔 係 點解 一 學 就 識 游水 。 游 到 成 條 魚 噉 ， 連 哥哥 都 冇 佢 游 得 咁 好 。
Fatima 由 日日 喺 島邊 散步 ， 變成 日日 潛入 水底 冒險 。 佢 以前 一直 覺得 島仔 係 全 世界 最 靚 嘅 ， 點知 原來 海底 世界 仲要 靚 十萬 倍 ！ 橙色 嘅 珊瑚 、 黑白相間 嘅 熱帶魚 、 奇形怪狀 嘅 石頭 、 成 個 人 咁 大 嘅 海龜 …… 每 一 樣 嘢 都 好 新奇 。
不過 Fatima 唔 係 咩 時候 都 可以 去 游水 。 例如 夜晚 嗰 陣 ， 或者 落雨 、 大風 嘅 時候 ， 爸爸 媽媽 都 會 禁止 Fatima 落水 。 Fatima 唔 明 ， 明明 大海 睇 上去 仲 係 咁 平靜 ， 就算 係 大風 ， 都 吹 唔 到 入 海底 啦 ， 究竟 有 咩 咁 危險 ？
有 一 晚 佢 帶 埋 防水 電筒 去 到 海邊 ， 想 靜 雞雞 去 游水 。 因為 佢 實在 太 想 知道 夜晚 嘅 海底 係 點 喇 ！ 究竟 啲 魚 係 唔 係 去 晒 瞓覺 ？ 海龜 又 會 唔 會 反肚 瞓 ？
「 Fatima ！ 唔 好 ！」 月亮 見到 即刻 阻止 。
「 我 只 係 去 一陣 啫 ， 唔 驚 嘅 ！」 Fatima 是但 應 咗 句 ， 就 一頭 潛 咗 入 水底 。
Fatima 喺 水底 打開 電筒 ， 原來 夜晚 嘅 海底 係 咁 安靜 ， 所有 動物 都 唔 見 晒 ， 可能 去 晒 瞓覺 。 得 啲 植物 孤零零 噉 順水 擺動 ， 粒聲 唔 出 ， 可能 都 已經 瞓 咗 。 Fatima 越 睇 越 著迷 ， 越 游 越 遠 …… 突然 ， 佢 覺得 有 啲 唔 對 路 。 佢 覺得 水流 嘅 感覺 唔 同 咗 。 佢 即刻 想 游 返 上去 ， 但 水流 突然 變 得 好 急 ， 不斷 打 返 Fatima 落 去 ！ Fatima 係 噉 向 上 游 ， 水流 就 不斷 壓低 佢 。
啊 ， Fatima 冇 力 喇 ， 佢 開始 唔 夠 氧氣 ， 慢慢 沉 落 水底 …… 呢 個 時候 ， 一 度 温暖 柔和 嘅 光芒 射 落 嚟 ， 托 起 Fatima ， 將 佢 帶 上 海面 ， 輕輕 放 喺 沙灘 上面 。 原來 出面 落 緊 大雨 ， 又 吹 緊 大風 ， 所以 海 入面 先 有 咁 多 暗流 。
Fatima 喘 咗 陣 氣 ， 又 嘔 咗 啲 海水 ， 好 狼狽 噉 走入 附近 一 間 木屋 避雨 ， 之後 先 抬起 頭 去 揾 啱 啱 救起 自己 嘅 光 ——
原來 係 月亮 。
佢 仍然 一臉 平靜 噉 望 住 Fatima ， 一 啲 責怪 嘅 意思 都 冇 。
「 大海 充滿 智慧 同 寶藏 ， 不過 同時 都 暗藏 好多 危險 。 」 月亮 繼續 講 ： 「 微風 可以 令 你 涼爽 ， 不過 一旦 變 得 暴烈 ， 可以 摧毀 你 嘅 家園 。 喺 黑夜 散步 ， 會 令 你 覺得 平靜 ， 不過 亦 可能 會 不知不覺 噉 帶 你 去 咗 懸崖 邊 。 樹木 畀 咗 好多 資源 我 哋 ， 不過 當 佢 跌 落 嚟 嗰 陣 ， 可能 會 奪去 你 嘅 生命 。 Fatima ， 你 一定 要 學 識 敬畏 大自然 。 」
Fatima 覺得 好 羞愧 ， 原來 自己 喺 大自然 入面 係 咁 渺小 ， 是 但 一 個 浪 都 可以 打沉 自己 。
「 多謝 你 啊 月亮 ， 我 以後 唔 會 再 咁 自大 㗎 喇 。 」
月亮 微笑 ， 月光 柔柔 噉 照 落 暴雨 下 嘅 大海 。 大海 仍然 好 安靜 ， 就 好似 咩 事 都 冇 發生 過 。
「 噉 就 乖 喇 。 按照 大自然 法則 ， 我 係 唔 可以 干涉 你 哋 嘅 事 。 啱 啱 我 救 你 ， 已經 係 做 錯 咗 。 我 唔 可以 再 畀 你 見 到 —— Fatima ， 你 合埋 對 眼 吖 。 」
Fatima 係 噉 講 對 唔 住 ， 喊 到 成 塊 面 都 花 晒 。 佢 唔 想 冇 咗 月亮 ， 佢 唔 想 冇 咗 呢 個 咁 重要 嘅 朋友 。
「 即使 你 再 聽 唔 到 我 把 聲 ， 見 唔 到 我 個 樣 ， 我 嘅 月光 、 我 嘅 顏色 仍然 會 喺 天 上面 陪 住 你 。 我 亦 會 一直 喺 月球 嘅 另一面 望 住 你 ， 所以 你 唔 使 傷心 㗎 …… 」
月光 慢慢 掃 落 Fatima 嘅 眼簾 ， 既 温暖 又 清涼 。 過 咗 好 耐 ， Fatima 先 肯 擘 大 返 對 眼 ： 佢 面上 嘅 月光 已經 消失 ， 而 天空 個 月亮 ， 就 只 剩返 一 個 散發 住 淺黃色 光 嘅 空殼 ， 唔 識 講 嘢 ， 亦 冇 温柔 嘅 目光 。 從此 Fatima 再 同 唔 到 月亮 傾計 ， 對 佢 嚟 講 ， 月亮 變成 一 個 沉默 嘅 顏色 。
Fatima 大個 之後 諗 返 嗰 晚 嘅 事 ， 都 唔 肯定 究竟 月亮 真 係 識 講 嘢 ， 定 只 係 小朋友 嘅 幻想 。 會 唔 會 係 自己 唔 小心 浸 親 ， 又 咁 好彩 飄 返去 岸邊 ， 就 幻想 係 月亮 救 咗 自己 ？ 佢 唔 肯定 。 佢 淨 係 知 每 晚 感受 到 月光 輕撫 嘅 時候 ， 內心 都 出奇 地 温暖 ， 就 好似 有 一 個 人 喺 遠處 祝福 緊 自己 ……
