曾參 嘅 謠言 同埋 三 隻 老虎 嘅 故事

曾參 嘅 謠言 同埋 三 隻 老虎 嘅 故事

人 嘅 說話 ，殺傷力 可以 好 大 。 話 說 好 耐 好 耐 之前 ， 有 個 出名 孝順 嘅 人 ， 佢 叫做 曾 參 ， 又 叫做 曾子 。 曾子 唔單止 孝順 ，佢 仲 好 好人 ，街坊 鄰里 都 好 鍾意 佢 。 有 一 日 ，有 另 一 個 同 曾參 同名同姓 嘅 人 ，佢 殺 咗 人 。 佢 嘅 鄰居 誤會 咗 ，以為 係 曾子 殺 咗 人 。

咁啱 呢 段 時間 ，曾子 同 佢 老師 孔子 出 咗 國 ，唔 喺 屋企 。 曾子 嘅 鄰居 去 咗 揾 曾子 嘅 媽媽 。 佢哋 同 曾子 媽媽 講 ：「你 個 仔 曾子 殺咗 人 呀 。」

曾子 媽媽 唔信 ，佢 一路 織布 ，一路 話 ：「我 個 仔 咁 孝順 ，又 咁 好人 ，佢 點 可能 會 殺人 呢 ？ 」曾子 媽媽 講完 呢 句 之後 ，冇 再 理 啲 鄰居 。

過 咗 幾 日 ，啲 鄰居 又 嚟 ，佢哋 又 話 ：「你 個 仔 曾子 殺 咗 人 呀 。」

曾子 媽媽 依然 係 唔信 ，佢 照舊 織 住 布 話 ：「我 個 仔 曾子 係 聖人 孔子 嘅 徒弟 ，有 聖人 孔子 做 佢 老師 ，佢 又 點 可能 殺人 呢 ？」

又 過 咗 幾 日 ，同 一 班 鄰居 又 嚟 多 次 ，佢哋 繼續 講 ：「你 個 仔 曾子 真係 殺 咗 人 呀 。」 呢個 時候 ，曾子 媽媽 終於 開始 識 驚 。 俾 鄰居 噉樣 講 多 幾 講 ，佢 真係 信 咗 佢 個 仔 有 殺人 ，仲 好 驚 啲 官 會 捉 埋 佢 ！ 佢 即刻 放低 織布 機器 ，急急腳 爬 牆 走佬 。

人 嘅 說話 ，殺傷力 可以 有 幾 大 呢 ？ 曾子 人品 咁 好 ， 曾子 媽媽 又 咁 信任 曾子 ， 但 係 俾 鄰居 講 多 幾 次 ， 曾子 媽媽 最後 都 係 信 咗 自己 個 仔 有 殺人 。 多 人 講 嘅 說話 係咪 就 可信 ？ 不如 講 多 個 故仔 ，畀 大家 再 諗 下 。

從前 有 一 個 大臣 ，佢 叫做 龐恭 。 龐恭 要 去 好 遠 嘅 地方 出差 ，佢 驚 背後 有 人 講 佢 壞話 ，於是 佢 就 揾 國王 。 龐恭 話 ：「大王 ，頭先 有 個 人 話 街市 有 隻 老虎 。 唔知 大王 你 信 唔 信 呢 ？」

國王 笑 住 話 ：「我 梗係 唔信 啦 ，街市 邊 可能 有 老虎 呀 ？ 笑 死 我 咩 。」

龐恭 話 ：「大王 ，我 收到 第二 個 人 嘅 消息 ，佢 話 街市 真係 有 老虎 喎 ，唔知 大王 你 信唔信 呢 ？」

國王 話 ：「街市 係 賣 餸 嘅 地方 ，冇 理由 有 老虎 㗎 。 不過 有 兩 個 人 噉 講 ，話唔定 真係 有 老虎 喎 。」

龐恭 話 ：「大王 ，我 收到風 ，有 第三 個 人 話 街市 真係 有 老虎 ，仲 咬 死 咗 好多 人 ，啲 人 嚇 到 走 晒 呀 。」

國王 話 ：「我 唔會 畀 隻 老虎 繼續 傷害 我 嘅 子民 ！ 人 嚟 ，快啲 派 士兵 去 街市 捉 老虎 ！」

龐恭 話 ：「哎 ！ 大王 咪住先 。 其實 我 頭先 係 同 你 講笑 咋 。 街市 入面 冇 老虎 ，更加 冇 人 同 我 報告 街市 有 老虎 。」

國王 先 知道 龐恭 喺度 玩嘢 。 佢 問 龐恭 ： 「 龐恭 呀 ， 點解 你 要 呃 我 呢 ？ 」

龐恭 話 ：「噉 係 因為 我 嚟緊 要 去 好 遠 嘅 地方 出差 ，我 驚 有人 喺 背後 講 我 壞話 。 一 個 人 講 ，你 可能 唔信 。 兩 個 人 講 ，你 就 會 開始 半信半疑 。 到 三 個 人 講 ，無論 件 事 係 幾咁 假 、幾咁 荒謬 都 好 ，多數 人 都 會 信 到 十足十 。 而 我 走咗 之後 ，講 我 壞話 嘅 人 一定 唔止 三 個 。 大王 你 一定 要 細心 分析 佢哋 講 嘅 嘢 真唔真 呀 ！」 結果 之後 真係 有 好多 人 背後 講 龐恭 壞話 ，而 大王 又 真係 信 咗 ，從此 遠離 龐恭 ……

所以 話 ，我哋 講嘢 真係 要 好 小心 ，資訊 未 factcheck 前 都 唔好 亂噏 ，因為 一 個 唔覺意 ，就 會 傷害 咗 其他 人 。

（曾 參 殺 人 按 《 戰國策 ． 秦策 二 》 改寫 ，三 人 成 虎 按 《 韓非子 · 內儲 説 上 》 改寫 ）