涼茶舖 嘅 Happy Hour
香港 天氣 好 熱 ， 又 成日 落雨 ， 好 易 就 會 令 人 覺得 周身 唔 舒服 ， 特別 係 熱氣 嗰陣 。
隔籬 黃 叔叔 就 係 噉 ， 所以 佢 會 過嚟 飲 涼茶 。 佢 攞 起 一 碗 廿四味 飲 到 底 ， 飲 完 就 擺低 個 碗 同埋 一 張 十 蚊 紙 。 廿四 味 好 苦 ， 所以 樓上 黃 師奶 嚟到 淨係 會 飲 五花茶 ， 五花茶 冇 咁 苦 ， 黃 師奶 話 飲 完 好 舒服 。
賣 晒 舖頭 前面 張 枱 上面 嘅 涼茶 之後 ， 爺爺 又 喺 茶壺 倒 返 一 碗碗 出嚟 。 然後 佢 叫 埋 我 一齊 行入 舖頭 後面 ， 幫 佢 將 啲 藥材 加 落去 一 大 煲 水 入面 煲 。 爸爸 返工 嗰陣 ， 我 就 會 喺 爺爺 間 涼茶舖 幫手 。 過 咗 冇 耐 ， 嗰 一 大 煲 水 就 變 咗 深啡色 ， 仲 傳嚟 好 香 嘅 中藥 味 。
我 最 鍾意 嘅 都 係 茶葉蛋 嘅 香味 ， 爺爺 每 次 煲 好 一 煲 ， 都 會 攞 一 個 畀 我 食 。 我 就 坐 喺 天花板 嘅 大 風扇 下面 邊 食 邊 吹 涼風 。 把 風扇 已經 用 咗 好 耐 ， 另外 地下 嘅 綠色 紙皮石 地板 、 木 枱櫈 同埋 裝 涼茶 嗰啲 銅壺 ， 都 係 由 爺爺 細個 開始 用 到 依家 。
我 食 緊 茶葉蛋 嘅 時候 ， 爺爺 就 會 喺 隔籬 同 我 講 以前 嘅 故仔 。 喺 二十 世紀 初 嘅 時候 ， 爺爺 嘅 爺爺 為咗 逃避 戰亂 而 嚟到 香港 ， 住 咗 喺 黃大仙 。 當時 社會 大家 都 好 窮 ， 有 感冒 唔舒服 就 唯有 飲 涼茶 。 因為 爺爺 嘅 爺爺 本身 係 做 中醫 ， 所以 時不時 都 會 幫 人 睇病 。 佢 有 一 條 祖傳 秘方 ， 最後 仲 開 埋 呢 間 涼茶舖 。
爺爺 話 佢 細個 嘅 時候 都 會 幫 佢 爺爺 煲 涼茶 ， 由 朝 做 到 晚 。 嗰陣時 嘅 涼茶舖 有 好多 人 ， 大家 一邊 飲 涼茶 一邊 傾計 。 入面 仲 有 電視機 同 點唱機 ， 啲 人 會 嚟 睇 電視 同 聽歌 。 附近 又 有 好多 賣 日用品 嘅 地攤 同埋 賣 小食 嘅 檔口 ， 好 墟冚 。 但係 依家 啲 後生仔 唔 飲 涼茶 ， 佢哋 都 係 鍾意 飲 珍珠 奶茶 同 水果茶 多 啲 。
我 想像 唔 到 爺爺 所 講 嘅 黃金 時代 究竟 係 點樣 ， 因為 依家 會 嚟 涼茶舖 飲 涼茶 嘅 人 越嚟越 少 。 最近 ， 周圍 好多 舊 舖頭 都 開始 閂門 唔 做 生意 ， 亦都 多 咗 啲 反對 標語 ， 又有 街坊 陸續 搬走 。 我 聽 啲 人 講 話 呢 區 就嚟 要 重建 。
之後 有 一 日 ， 有 幾 個 著 住 西裝 嘅 男人 嚟到 ， 話 要 揾 爺爺 傾 關於 間 涼茶舖 嘅 事 。 嗰 晚 ， 爸爸 同 爺爺 傾 咗 好 耐 ， 爸爸 想 爺爺 賣 咗 間 舖 ， 留 返 啲 錢 送 我 去 外國 讀書 ， 爺爺 最後 應承 咗 。
之後 我 問 爺爺 會唔會 唔捨得 間 涼茶舖 ， 爺爺 調轉頭 問 我 ： 「 你 覺得 涼茶 係 咩 味 ？ 」 我 話 ： 「 係 苦 嘅 。 」 爺爺 話 ： 「 涼茶 一 飲 落 口 你 會 覺得 苦 ， 但係 飲 完 之後 你 個 口 會 有 回甘 ， 你 會 覺得 係 甜 嘅 。 」
涼茶 鋪頭 上面 把 大 風扇 一直 轉 呀 轉 ， 轉 到 開始 有啲 噪音 。 我 同 爺爺 講 話 我 想 間 涼茶舖 一直 做 落去 ， 但係 爺爺 同 我 講 話 佢 想 有 多 啲 時間 同 我 周圍 去 玩 。
