觀塘 交通 日常

唉 ，我 又 塞 咗 喺 度 差 唔 多 一個 鐘 喇 ……

自從 要 去 觀塘 返工 開始 ，我 每 日 都 要 為 放工 搭 咩 車 返 屯門 而 煩惱 。 啱啱 嚟 呢度 返工 嗰陣 ，我 係 搭 港鐵 嘅 ，不過 觀塘 港鐵站 永遠 都 係 咁 多 人 ，我 成日 都 要 排隊 等 幾 班 先 上到 車 。 上 到 車 之後 ，一 大 班 人 塞 喺 車廂 入面 ，個 身 郁 都 郁 唔 到 ，好 逼 好 辛苦 。 夏天 嘅 時候 ，呢 個 空間 仲 會 瀰漫 住 一 大 陣 嘅 臭 汗 味 ——如果 企 喺 身邊 嗰 個 咁 啱 係 成 身 大 汗 嘅 ，佢 一 逼 埋 嚟 ，隨時 同 佢 有 肌膚 之 親 ，感覺 佢 啲 汗水 會 黐 晒 落 我 度 囉 ……

所以 我 決定 轉 搭 巴士 。 雖然 車程 好 耐 ，但 至少 有 位 坐 ，又 唔 使 同 人 逼 。 始終 返 咗 成日 工 ，好 攰 好 眼瞓 ，返 屋企 嗰 程 車 都 想 坐低 唞下 。 更 重要 嘅 係 ，巴士 可以 由 觀塘 直達 屯門 ，唔似 港鐵 噉 要 中途 轉車 。

不過 ，就 喺 我 第 一 次 放工 搭 巴士 返 屋企 嗰 日 ，發生 咗 件 好 「神奇 」嘅 事 。 記得 嗰 日 係 星期一 ，我 收工 嗰 陣 已經 好 攰 ，6 點半 左右 已經 上 咗 巴士 上層 最 前排 個 位 坐 。 冇 耐 我 就 瞌 着 咗 ，一心 諗 住 可以 喺 呢 一 個 鐘 車程 休息 下 ，瞓 醒 就 返 到 屯門 。

瞓 咗 一 段 時間 ，我 就 俾 好多 響聲 嘈 醒 。 我 擘大 眼 ，見到 前面 有 好多 架 車 停低 晒 。 我 再 望 一 望 周圍 熟識 嘅 建築 ，就 知道 我 仲 喺 觀塘 ……嗰 陣 天色 已經 好 黑 ，我 睇 一 睇 錶 ：已經 係 8 點 ！ 換言之 ，我 竟然 喺 觀塘 塞車 塞 咗 一 個 半 鐘 ！ 最後 ，我 返 到 屯門 嗰 時 已經 9 點 幾 。

疫情 關係 ，餐廳 夜晚 10 點 後 冇 得 堂食 ，所以 好多 餐廳 都 係 9 點半 左右 截單 。 我 揾 咗 好 耐 先 揾 到 可以 外賣 嘅 餐廳 。 結果 ，我 返 到 屋企 食 埋 飯 ，沖 完 涼 ，已經 成 11 點 。 我 拿拿聲 瞓覺 ，準備 第 二 日 朝九 晚六 嘅 打工仔 生涯 ——我 發誓 以後 都 唔 會 再 搭 巴士 返 屯門 ！

就 係 噉 ，我 又 轉返 搭 港鐵 。 好在 港鐵 後來 開通 咗 屯馬線 ，我 依家 只 需 搭 到 鑽石山 轉 一 次 車 ，就 可以 直達 屯門 。 雖然 屯馬線 都 係 好多 人 好 逼 ，而且 每 程 車費 貴 幾 蚊 ，但 至少 唔 使 塞車 ……

今日 我 一如 以往 打算 放工 搭 屯馬線 返 屋企 ，點知 突然 收到 女朋友 message ——我 一 睇 就 知 大 鑊 ，我 唔 記得 咗 約 咗 佢 今晚 7 點鐘 睇 戲 ，仲要 係 屯門 嘅 巴黎 倫敦 紐約 米蘭 戲院 ！ 我 即時 屈指 一 算 ，發現 無論 搭 巴士 定 港鐵 ，都 好 難 趕 得切 。 於是 我 決定 放手 一 博 ， 一 放工 就 馬上 搭 的士 去 屯門 ！

結果 我 都 係 逃 唔 出 觀塘 嘅 塞車 魔咒 ：唉 ，我 又 塞 咗 喺 度 差 唔 多 一 個 鐘 喇 ……

望住 的士 咪 錶 係 噉 跳 ，電話 係 噉 彈出 一條 一條 女朋友 問 我 到邊 嘅 轟炸 message ，再 聽住 時間 一分 一秒 過去 嘅 手錶 滴答聲 ，我 開始 心 驚 膽 跳 ：睇 嚟 呢 程車 嘅 代價 ，會 非常 沉重 ……