父 「子 」
禮拜六 ，朝早 六 點 半 ，我 起身 去 廁所 。 行過 客廳 ，老豆 已經 起咗 身 ，開住 電視 ，坐 喺 梳化 睇 新聞 。 「早晨 啊 阿仔 。」 佢 喺 機場 做 維修 ，日日 返 十幾 個 鐘頭 。 照計 呢個 時間 ，佢 應該 已經 出咗 門 返工 。 「……早晨 。」
去 完 廁所 ，諗 住 返 房 繼續 瞓 ：我 頭先 打機 打 到 四點 先 瞓 。
「阿仔 呀 ？」
「做咩 ？」
「不如 陪 老豆 去 食 個 早餐 ？」 吓 ，咁 突然 ？
「你 唔係 要 返工 咩 ？」
「我 今日 請咗 假 。」 老豆 係 工作狂 ，責任心 好 重 ，我 未 見過 佢 請假 。
「你 想 食 嘅話 都 得 嘅 …… 」我 當 去 食 宵夜 。
刷 好 牙 ，洗 完 面 ，換 埋 衫 ，先至 六點十 。
「你 諗住 去 邊間 ？」
「冇所謂 啊 ，你 揀 ？」 於是 我 帶 咗 老豆 去 街口 嗰 間 茶餐廳 ，夠 近 ，而且 得 佢 開 咁 早 。 一 坐低 ，老豆 就 遞 咗 個 餐牌 畀 我 ：「睇 下 想 食 啲 咩 ？」
「我 諗 好 咗 㗎 喇 。」
「咁 快 ？」
「我 成日 嚟 ，記得 晒 有 咩 食 。」
「哦 ，係 呀 ……好 好食 㗎 ？」
「唔差 。」
我 嗌 咗 一 碗 沙嗲 牛肉 麪 ，飲 凍 檸水 ；佢 嗌 咗 一 碗 腿蛋通 ，飲 凍 奶茶 。 佢 好似 好 鍾意 飲 奶茶 ，屋企 擺 咗 一 包包 奶茶粉 ，我 每 朝 起身 都 會 見到 垃圾桶 有 一 包 。
「伙記 ，加 多 份 西多士 吖 ！」
「你 好 肚餓 ？」
「唔係 呀 ，我 驚 你 唔夠 飽 吖 嘛 。」
「我 一 碗 麪 夠 㗎 喇 。」
「欸 ，多士 可以 兩 份 食 嘅 啫 ！」
啲 嘢食 好 快 到 ，然後 我哋 都 食 得 好 專心 ，一 句 偈 都 冇 傾 ，氣氛 有啲 尷尬 。 最後 係 老豆 第 一 個 出聲 ：「你 真係 夠 飽 ？」 佢 已經 切好 份 西多士 ，留 咗 半 份 畀 我 ，但 我 始終 都 冇 掂過 份 多士 。
「 OK 啊 ，夠 㗎 喇 。」 等陣 食 太 飽 就 唔使 瞓 喇 。
「哦 ……噉 我 食埋 佢 啦 。」 印象 中 佢 好似 好 憎 人 食 淨 嘢 。
「呢度 啲 嘢食 真係 唔錯 ，唔怪之得 你 ——」
「埋單 囉 ？」 我 打斷 咗 老豆 ，佢 亦 窒 咗 窒 ：「 吓 ！ 而家 先 七點八 ，好 早 咋 喎 ！ 不如 陪 老豆 踩 返 轉 單車 哩 ？」 我 平時 成日 約 人 踩 單車 ，屋企 都 擺 咗 架 幾 貴 嘅 單車 。
「啱啱 至 食飽 ，唔 踩 喇 。」
「噉 ……一係 去 公園 散步 ？」
「我 真係 有啲 攰 ，想 返 屋企 瞓覺 。」
老豆 冇 再 講 啲 咩 ，就 攞 咗 張 單 去 埋 。 返到屋企 ，我 直接 返 房 攤上 床 ，望住 天花板 ——嗰陣 啱啱好 八點 。 老豆 成 朝 都 好 古怪 。 定係 佢 份 人 不嬲 都 係 噉 ，只係 我 見 得 佢 太 少 ，唔 了解 佢 ？
