هل انت مخير أم مسير؟ | Do You Have Freewill?
أكدت آخر الاختبارات العلمية
أنهم وضعوا مجموعة من البشر في حديقة
قصدي غرفة
وأمامهم كبسة
وطلبوا منهم إنهم يكبسوا الكبسة
لما يجي ع بالهم
مستعرضين إرادتهم الحرة
لكن كانت المفاجأة عندما بينت قراءات الكمبيوتر حقتهم
إنه الإشارات العصبية لحركة الكبس على الكبسة
طلعت قبل ما الأشخاص يفكروا حالهم
قرروا يكبسوا الكبسة
آيلا: ماما بدي خيار
سلام: طلعت قبل ما الشخص يفكر حاله قرر؟
سلام: يعني مخي بياخد عني القرار قبل ما أنا أكون واعية؟
سلام: ومتهيألي انه انا اللي أخدت القرار؟
سلام: طيب أنا قمت أحضر خيار لآيلا بإرادتي؟
سلام: ولا غصب عني؟
سلام: معقول حتى آيلا بتتحكم فيني وبقراراتي؟
سلام: هو أنا عندي إرادة حرة؟
سلام: ولا بتهيأ لي؟
مرحبا
من فترة أطلق إيلون ماسك شريحة نيورالينك
اللي بتشبك مخك مع كمبيوتر
ناقشنا هالموضوع بالتفصيل في حلقة سابقة
بتقدروا تشوفوها هون
المهم
أول شيء بخطر ع بالك
إنه هلأ الكمبيوتر رح ينهي
رحلة طويلة من العيش الحر
والقرارات الحرة
وبتصير مقيد ب شو الكمبيوتر شايف الأنسب
بس لحظة
لما حطوا البشر بحديقة قصدي بمختبر
زي ما شفنا قبل شوي
لاقوا إنه مخك
بياخد القرار عنك قبل ما انت تكون واعي
ومتهيألك انك انت اللي اخدت القرار
وهذا الشيء بخليك تسأل سؤال جوهري
هل أنا أصلا فيه عندي إرادة حرة من الأصل؟
إنسان: أنا عدم المؤاخذة بحب أكون متحكم
إنسان: شياطين الأنا بتتنطط حولي طول الليل
إنسان: طيب
إنسان: خلينا نبدأ من الأول
إنسان: أعضائي
إنسان: نشوف أعضائي
خد نفس
ووقف قلبك شوي
ها
القلب بدق طول الوقت
مزبوط؟
النفس شغال
الطحال
الكبد يا ويلي عليه بس شغال
برضاي أو بدونه
أعضاء الجسم بتشتغل لحالها بدون ما تحتاج أي وعي منك
معلش لساتنا ببداية الطريق
إنسان: طيب مشاعري؟
إنسان: مشاعري
إنسان: نشوف مشاعري
هلأ ارجع شوي بالزمن
وتذكر قراراتك العاطفية
والناس اللي صاحبتهم
قرارات زبالة
فكر فيها
مشاعر زي الحب أو المتعة
أو حتى الخوف
كلها هاي عبارة عن موصلات عصبية في مخك
وردات فعل لجسمك
من دماغك
عشان يحافظ على بقاءه
وهاي مش قرارات بياخدها دماغك
بل مبرمجة فيه بطريقة غريزية اتوماتيكية.. تقريبا
مثلا
انت بتخاف إذا كنت في خطر
البيئة هي اللي كيفت مخك على هذا الكود تبعها
متبرمج عليها يعني
أمنا الطبيعة: هلأ فيه دب حبيبي
أمنا الطبيعة: فيه دب.. بدنا نخاف
أمنا الطبيعة: مش نوقف قدام الدب نحكيله تعال كلني أحسن بستاهل
أمنا الطبيعة: هذا الكلام حكي ضد التناسليين
أمنا الطبيعة: بخاف أحكيلك وين تحطه وتزعل
أمنا الطبيعة: طاقة بدي طاقة
أمنا الطبيعة: وسعلي العيون أشوف
أمنا الطبيعة: ديرلي 3 كيلو أدرينالين
أمنا الطبيعة: يا سلام.. عشان نشوف طرق للنجاة بطريقة أفضل
أمنا الطبيعة: صح ولا لأ؟
أمنا الطبيعة: صح؟
أمنا الطبيعة: قوم
أو مثلا لما تجيب بيبي
يا الله شو كيوت
عمرك فكرت ليش البيبي هالقد كيوت؟
عشان لما يبكي
ويخبص البيت
ويسهرلك طول الليل
ويشخ ع حاله
أكيد لازم يكون كيوت
عشان وانت بتنظف شخته تقول يا باااااي ما أحلاه
احنا كتير بنحب ولادنا
مستعدين نحميهم بأي طريقة
بس ليش؟
لا تنسى انه ابنك هو جيناتك الملكية المقدسة
اللي رح تعمر الأرض من بعدك
ف بدك تحميها
مشاعر الحب والترابط القوية
والغامرة هاي اللي فينا
هي برضو ردات فعل من مخك
عشان تحمي الحياة
بتحب ابنك مثلا عشان تحميه
تمرر جيناتك بشكل سليم
وتحافظ
على استمرارية الحياة
وهاي المشاعر إلتغت
بس أنا عالأقل بختار أنطرب على أم كلثوم
وما بحب أغاني فيروز
وبحب فاكهة الصبار كتير
بس مستحيل مثلا احضر فيلم لتوم كروز
هاي إرادة حرة ولا مش إرادة حرة؟
صراحة بالحقيقة هي مو إرادة حرة
تفاعل مخك مع الموسيقى أو الصبار أو توم كروز
شيء أوتوماتيكي
الموسيقى لما تفوت على مخك
بتفعل نفس الأجزاء المسؤولة عن المكافأة والنشوة
اللي بتتفعل لما بتكون منتشي
أو هارب من ثور هايج
بعد الهروب من الثور
بتشعر بالسعادة والمكافأة
وهاد نظام أوتوماتيكي جدا
بيشتغل عندك بدون تدخلك
يعني مش انت اللي بتختار تحب نوع موسيقى معين
ولا بتختار تستثقل دم توم كروز مثلا
عشان هيك
ممكن تلاقي ناس بتنطرب وبتكيف ع هذا النوع من الموسيقى مثلا
طيب
علماء كتير حاولوا يعرفوا
إنه كيف ممكن حد يحب نوع موسيقى
ويكره نوع ثاني
والشيء الوحيد اللي لاقوه
انه تفضيلاتنا الموسيقية محفورة بعمق بالبيولوجيا تبعتنا
مسبقة التحديد في مخنا
ما الك عليها أي سيطرة
لا تنسى كمان انه الذاكرة والظروف البيئية بتلعب دور كبير
مثلا.. أنا
الصبار بيذكرني بطفولتي
لما كان ابوي يبيع خضرة عالبيك أب ويحطنا معاه ورا
ويجيب صبار
بعديها انتقلت للخليج.. ومات أبوي
وبطلت آكل صبار
إجباري لما آكل صبار رح احبه.. لانه بيذكرني بحقبة رائعة من حياتي
إنسان: يعني لا أعضاء
إنسان: ولا مشاعر
إنسان: ولا اهتمامات
إنسان: ولا تفضيلات
إنسان: شكلنا رح نتعلم كثير اليوم
إنسان: اهااااا
إنسان: التعلم
حلو كتير
انا بحتاج أكون واعية مثلا عشان أحل رياضيات
أو أرد على حدا بلغة ثانية
أو حتى.. لما أسوق السيارة
لا هيك صراحة بالغت شوي
مش كل شي بنعمله بحتاج وعينا
بحتاج وعينا لفترة
بعدين بيكمل حياته المخ
كيف يعني؟
أمنا الطبيعة: انت مبارح كنت سايقة السيارة من شارع الجامعة للبيت
أمنا الطبيعة: صح؟
سلام: صح
أمنا الطبيعة: وطول الطريق وانت بتفكري بالسيناريو اللي حيصير بينك وبين رهام
أمنا الطبيعة: لما تحكوا عن طلعة وادي رم بآخر الأسبوع
أمنا الطبيعة: صح؟
سلام: صح
أمنا الطبيعة: يعني طول الطريق
أمنا الطبيعة: ما فكرتي لا بالسواقة
أمنا الطبيعة: ولا بالطريق
أمنا الطبيعة: ولا حتى ثانية وحدة
أمنا الطبيعة: حصل ولا ما حصل؟
سلام: حصل
أمنا الطبيعة: وصلتي عالبيت تمام
بدون أي مشاكل وعرفتي الموقع بالتحديد بدون أي حوادث
أمنا الطبيعة: برضو حصل
أمنا الطبيعة: انت أصلا ما عندك سيطرة
أمنا الطبيعة: ولا وعي
أمنا الطبيعة: على معظم الشغلات اللي بتعرفي تعمليها
أمنا الطبيعة: وبتقوليلي إرادة حرة؟
الصراحة يا جماعة
ماما الطبيعة صح
هلأ انت مخك عبارة عن نظامين
النظام الأول
الأوتوماتيكي الغريزي
اللي بيتصرف بدون ما يفكر بناء على برمجته وبس
والنظام الثاني
النظام الثاني هو انت الواعي المركز
اللي متحكم بعملية التفكير المنطقي العقلاني
والتحليلي
اول ما تتعلم شي جديد مثلا زي الانجليزي
بتكون شغال على النظام الثاني
لإنه الانجليزي شيء جديد عليك
محتاج تركز وتحلل وتكون واعي
في أول فترة
بتحتاج مجهود وتركيز متعمد
لكن كل ما تتعلم اكتر
وتمارس اللغة أكتر
بتنتقل هذه المهمة من انت الواعي القاصد المريد
يعني من النظام الثاني
لجهازك الأوتوماتيكي الحيواني
اللي هو النظام الأول
وبتصير تعملها بدون اي سيطرة واعية
حتى الرياضيات اللي الناس بتعتبرها اصعب شي بالعالم
بتصير مع الممارسة
تحلها بدون إرادتك
امسك قدامك شغلتين
مثلا موبايل وقنينة ماء
أي وحدة فيهم أثقل؟
الماء
كيف حسبتها؟
ما حسبتها أصلا
أوتوماتيكيا إيدك عرفت الجواب بدون تفكير
طيب
1+1 كم؟
2 كيف حسبتها؟ برضو ما حسبتها
لإنه تلقائيا مخك طلع بالرقم 2 لإنه كتير متعود عليه
عشان هيك لما تتعلم انجليزي مثلا
أولها مخك بكون مركز وواعي وانت بتمارسها
لكن مع السنين
يمكن حتى تصير تفكر بالانجليزي بدون إرادتك
لانه الممارسة خلت المخ يفهمها
لدرجة انه مش محتاج يكون واعي خلص
عشان يعملها
وبتصير تحتاج نسبة تركيز من ذاتك الواعية
والحرة
بشكل أقل
الوعي
هو اللي بيخليك تقسم وتوزع التركيز والاهتمام تبعك على شغلات معينة
لكن بعدين مع الممارسة
بصير المخ الاوتوماتيكي هو يكمل شغله لحاله ومش محتاج رأيك
كل الصفات التعليمية هيك
الشي اللي بتعرف تعمله منيح
ما الك سيطرة عليه ولا إرادة
لانه بيحصل تلقائيا
طييب.. شو بدنا نعمل في هاي المعلومات الحقيرة
شوف
أعضاءك بتشتغل لحالها
ومشاعرك بتشتغل لحالها
واهتماماتك انت ما بتختارها
والاشياء اللي بتتعلمها بتصير اوتوماتيكية
حتى اصغر قراراتك.. مخك الغير واعي بياخدها عنك
انت مين ووين من كل هاد؟
هلأ انسى كل شي حكيته
وغمض عيونك
وخد نفس عميق
تخيل كرة زرقاء
بنص غرفة بيضاء
وين شايف الصورة؟
تقريبا متخيلها موجودة قدامك
صح؟
طيب
هلأ قول براسك.. بصوت عالي
A.. B.. C.. D
وين سامع الصوت؟
ع الأغلب سامعه بالخلف
اذا قلتلك تخيل حالك واقف بزاوية الغرفة
حتقدر تتخيل؟
يعني.. بسهولة حتقدر تتخيل
لإنه ما فيه مكان محدد للعقل الواعي بذاته
الوعي هو مساحة تخيلية
مش محدد بمكان الدماغ
بغض النظر عن تعقيدات الإرادة الحرة
وحتى لو العقل كان مكان خيالي.. مش محدد بمساحة حقيقية
لكن وعيك بذاتك
تجربتك اله.. هاي حقيقية
انت حقيقي
ترليونات من الخلايا اللي بتشتغل مع بعض بتناغم عجيب
مليارات الخلايا العصبية اللي بتشكل اكثر نظام معقد في الكون
الدماغ
انت بتمر بحياتك القصيرة بكتير تجارب فريدة
الخليط بين الحماس والخوف اللي بتحسه لما
بكون اول يوم دوام في الشغل الجديد
شعور الترابط والتعاطف اللي بيغمرك لما تتطلع على طفلك الصغير الضعيف
الادرينالين اللي بعبي جسمك لما بتنطي بالمي من مكان عالي انت وصحابك
للفراشات اللي بتحسيها ببطنك لما تشوفي حبيبك
حتى لو الوعي مش شيء ملموس يمكن قياسه
وحتى لو انك فاقد السيطرة على اغلبية قراراتك
انت موجود
ومعك فرصة مميزة ورهيبة
ونادرة جدا
انت ما اخترت الموسيقى اللي بتحبها
بس بتقدر تستمتع فيها
ومع إنك ما اخترتي تخافي لما تنطي بالمي
بس بتقدري تستمتعي بهذا الحماس
طز بالإرادة الحرة
بس لحظة
إذا طز بالإرادة الحرة
ليش بنحط المجرمين بالسجن؟
اهااا
حلو كتير
الوعي عاد اللي خلاك تقدر تستوعب كل هذا الكلام اللي أنا حكيته قبل
هو أصل الأخلاق
الوعي هو اللي بيعطيك مقياس لأعمالك
"جيدة ولا سيئة"
تذكر الكلب مثلا
الكلب الكلب.. مش هداك الكلب.. الحيوان يعني
اذا حطيت قدام الكلب صحن أكل
قدرات مخه البسيطة بتسمح له بخيارين
حسب جوعان ولا لأ
يا بياكل
يا ما بياكل
اسأل الكلب
ليش اخترت تاكل بدال ما ما تاكل.. شو بحكيلك؟
ولا اشي
مش رح يعرف اصلا يبرر افعاله ولا يفهمها
أما انت
اذا حطينا قدامك صحن أكل.. قدرات مخك
والمرونة الدماغية اللي فيه
وتعقيد الشبكة العصبية
هاي القدرات كلها
بتعطيك اكتر بكتير من خيارين زي الكلب
ممكن تاكل
او ممكن تقوم وتسخن الأكل اول
او ممكن تفكر بجاركم الفقير.. تقول خليني اعطيه الصحن لاني انا مش جوعان هلأ
او ممكن تسأل
طب مين اول حضارة زرعت رز؟
طب كيف كان شعور صاحب الدكان
وهو ببيعه؟
احنا البشر قدراتنا الدماغية متطورة جدا
ووعينا المعقد
بيعطينا مجال كبير جدا من الخيارات
للتعامل مع أبسط المواقف
وهون بيجي دور عقلك الواعي التحليلي
انه بيقدر يختار من بين خيارات كتير
انه مش بعطيك مساحة كبيرة للتفكير والاختيار بس
بل أيضا بيعطيك القدرة
انك تشارك كل هاي المعلومات والخيارات
مع الناس الثانيين
لما حد يسألك مثلا.. ليش سخنت الاكل؟
بتقدر بسهولة تفسر سبب اختيارك
على عكس الكلب
اللي مخه بخليه يتخذ قرارات بسيطة
لكن هو ما بعرف ليش اتخدها
ولا بقدر يبرر ولا يفسر الأسباب
صح مخك متحكم فيك
وصح اغلب افعالك أوتوماتيكية
لكن لو مخك لح عليك
اضرب الولد الصغير اللي جمبك مهو ما فيه حدا شايفك
انت
عندك الوعي والقدرات العقلية انك تفهم هاد الأمر الدماغي
وتحلله
وعندك القدرة انك ما تسمع كلامه
اذا بتحبوا المحتوى اللي بعمله وحابين تساعدوني
بتقدروا تدعموني على باتريون
كمان على باتريون كل شهر
رح نعمل جلسة مباشرة أونلاين
نتناقش فيها مع بعض نحنا الباترونز
بأشياء الها علاقة بالعلم.. بالحياة
يعني ندردش
اذا مهتمين بالموضوع
رابط الباتريون بتلاقوه بصندوق الوصف
سلام
طيب.. ما فيه داعي نحكي بموضوع القناة وإنه لازم تشترك وتخلي الجرس يرن.. إلى آخره
بس صراحة لازم أذكرك أو أذكرك
إنك تشوف أو تشوفي.. الفيديوهات التانية
يا أخي اسرح بخيالك
