مشوار عالبريد
الزبونة: السلام عليكن.
الموظف: وعليكوا السلام، كيف ممكن أساعدك؟
الزبونة: من فضلك بدي أبعت هالطرد لابني اللي بدرس في فرنسا.
الموظف: طيب خليني وزنو
الزبونة: اديش بيوخد وقت ليصل؟
الموظف: هادا الطرد بيوخد حوالي سبع تيام في البريد الجوي العادي.
الزبونة: ما في شي اسرع؟
الموظف: طبعا في البريد السريع وهادا بيوخد تلت تيام.
الزبونة: اديش بيكلف شحنو؟
الموظف: البريد العادي بكلف الف ليرة والبريد السريع بكلف الفين وميت ليرة.
الزبونة: يعني البريد السريع بيكلف ضعف البريد العادي.
الموظف: اي. ممكن تقولي هيك شي.
الزبونة: اوف!
الموظف: ايش قررت ستي؟
الزبونة: بالبريد السريع لو سمحت.
الموظف: ممتاز. لو سمحت اكتبي اسم وعنوان المرسل واسم وعنوان المستئبل على هادي الاستمارة.
الزبونة: تفضل
الموظف: بدي اسألك ستي في شي ممكن يتكسر؟
الزبونة: اي. في حلو متل بقلاوة وكعك ميشان العيد.
الموظف: طيب. بتحبي تأمني عالطرد؟
الزبونة: لا شكرا.
الموظف : بدك اشي ثاني؟
الزبونة: اي، لو سمحت، بدي اشتري تمن طوابع وعشرين مغلف.
الموظف: الحساب بطلع الفين وتلات مية ليرة.
الزبونة: تفضل هي المصاري.
الموظف: شكراً وهي الوصل.
الزبونة: مع السلامة
الموظف: مع السلامة.
