في سوق الخضار
الزبونة: مسا الخير.
البياع: مسا النور.
اهلا وسهلا تفضلي، المظبوط جيتي بالوقت المناسب،
قبل شوي وصلني خضار وفواكه طازة رح تعجبك.
شوفي هالبردئان شوفي هالتفاح كلن طازة.
الزبونة: اي شايفة، المحل نضيف وكل البضاعة ممتازة.
البياع: وكمان اسعارنا مناسبة، صدقيني عنا احسن سعر بالسوق.
الزبونة: لو سمحت بدي اشتري خيار، قديش سعر الكيلو؟
البياع: الكيلو بخمسة وستين ليرة ، بس منشان إنك أول مرة بتجي عالمحل، رح أعملّك خصم. رح أعملّك خصم، بحسبلك ياه بستين ليرة، كم كيلو بتريدي؟
الزبونة: لو سمحت، حطلي كيلين.
البياع: تفضلي. هاد الخيار من النوع الممتاز، زغير ولزيز للسلطة.
الزبونة: ممتاز، من فضلك، بدي اشتري بندورة كمان.
البياع: تكرمي، عندي احسن بندورة، بدك ياها للسلطة او للطبخ؟
الزبونة: بدي ياها للسلطة.
البياع: عندي بندورة بلدية للسلطة، شوفي هاي البندروة اديش قاسيه وطازة?
الزبونة: اي شايفة، اديش سعر الكيلو لو سمحت؟
البياع: سعر الكيلو خمسة وتمانين ليرة، ومشانك بحسبلك ياه بسبعين ليرة، تفضلي نقي البندروة اللي بتحبيها.
الزبونة: رح اشتري كيلو واحد بندورة.
البياع: بتأمري شي تاني؟
الزبونة: اي، قديش البطيخ؟
البياع: الكيلو بمية ليرة.
الزبونة: بس هيك غالي كتير!
البياع: البطيخ هلا غالي شوي لأنو بأول موسمه بس بعدين بيرخص، على كل ولا يهمك رح احسبلك ياه بـتمانين ليرة.
الزبونة: شكرا، بشتري بطيختين، بس انشالله يكونوا مناح مو مخوخين.
البياع: انا رح نقيلك ياهن بنفسي ... تفضلي، اكيد رح يكونوا طيبين.
الزبونة: شكرا كتير، هادا كل اللي بدي ياه، اديش بيطلع الحساب؟
البياع: حسابك بيطلع اربعمية وعشرين ليرة.
الزبونة: تفضل هاي المصاري، وشكرا كتير الك.
البياع: العفو، مع السلامة.
