لبنى عبد العزيز
دينا: كل عيد أم وحضرتك جميلة ومتألقة وفي أحسن حال يارب.
لبنى: أشكرك.
دينا: أنا مش عارفة أقول النجمة الجميلة الكبيرة لبنى عبد العزيز.
لبنى: يا حبيبتي.
دينا: ولا أقول الاعلامية الإذاعية المتميزة، سمراء النيل، وفتاة الجامعة ولا أقول عروس النيل.
لبنى: حبيبي، أشكرك أشكرك أحلى، واحدة أُم.
دينا: أحلى حاجة ماما لولو.
لبنى: أه، بالظبط.
دينا: يعني النهارده عيد الام وأنا عارفة إن مريم ودينا بناتك في أمريكا ومش معاكي فأنا حريصة إن أنا اللي أكون معاكي في عيد الأم.
لبنى: حبيبتي.
دينا: واحتفل بيكي.
لبنى: إنت زي بنتي بالظبط.
دينا: ربنا يخليكي إنت عارفة أنا بأحب حضرتك أد إيه.
لبنى : وأنا بأحبك كمان.
دينا: زعلانة إن بناتك مش جانبك في عيد الأم؟
لبنى: طبعا،ً خصوصاً إن عيد الام عندهم يوم تاني خالص، إحنا عيد الأم إختاره ...
دينا: مصطفى .....
لبنى: مصطفى أمين في الربيع.
دينا: بالظبط.
لبنى: وعيد يعني تاريخ ملائم جداً جداً، لكن هناك في أمريكا هو تاني حد في مايو.
دينا: بدايةً أنا هقول لبنى عبد العزيز الزوجة والأم، ضحيتي بنجوميتك الكبيرة وسافرتي وعشتي في أمريكا وإتغربتي ٣٠ سنة علشان تبقى زوجة وأم تربي الأولاد وتقعدي جنب جوزك وتقفي جنبه في حياته، كلميني عن المرحلة دي، لما تقعدي مع نفسك وتفتكري الغربة.
لبنى: ماكانش سهل يعني حياة النجومية كانت أسهل أوي أوي أوي، الغربة وحشة والكفاح طبعاً لأن احنا إبتدينا من الصفر وكان لسه بيدرس وأخدنا وقت طويل عقبال ما قدرنا نرتاح شوية. هو إختيار فعلاً لأن أنا كنت عملة عقد ب ٣ أفلام قبل ما أسافر علي طول ومكانش في نية إن أنا أقعد بره، كانت النية أو... أو....
دينا: أو إنك متقعديش تلاتين سنة يعني.
لبنى: لا لا أنا ماكنتش هقعد معاه، كان هيدرس وأنا أجي أعمل شغل وأرجع له وأروح وأجي وأروح وأجي.
دينا: كان وخدك بالراحة الأول كده.
لبنى: أه، لكن جه يوم وطلب مني ما أمشيش ويعني أنا كان لازم أختار. كان صعب أوي أوي إن أنا كنت أقدر أوفق بين الحاجتين يعني.
دينا: طبعا.
لبنى: ولبيت طلبه وقعدت معاه وعمري ما تندمت على أي حاجة.
دينا: ده اللي كنت هسألة لحضرتك ما جتلجيش لحظة تقولي يا ريتني ما عملت كده.
لبنى: ولا لحظة.
دينا: إزاي قدرتي بقى تغرسي في بناتك في وسط بلد تقاليدها مختلفة وعادتها مختلفة التمسك بالقيم بتاعتنا؟
لبنى: أنا ربيت بناتي بالظبط زي ما ربتني والدتي يعني على التربية التقليدية المصرية الل.... ودي كانت حاجة مختلفة جداً عن الحياة الأمريكية والحرية والانطلاق. فخورة بكدة لان لما بشوفهم النهاردة بلاقيهم بيعملوا مع بناتهم اللي أنا كنت بعملوا معاهم اللي أمي وجدتي كانوا بيعملوا معايا.
