Food - Lesson 5
بيحتفل المسلمين بالأعياد الاسلامية مرتين بالسنه، أول عيد اسمو عيد الفطر والثاني عيد الاضحى. وبيصادف عيد الفطر أول يوم بعد شهر رمضان المبارك، ورمضان هو الشهر الاسلامي المقدس اللي بيصوم فيه المسلمين لمدة ٢٩ أو ٣٠ يوم خلال ساعات النهار. وطبعا، عيد الفطر فرصة للتسامح بنحتفل فيها مع اللي بنحبهم وبنطبخلهم أكل زاكي كتير. وبعد رمضان بحوالي شهرين وعشر أيام بيجي عيد الأضحى، "العيد اللي بيدبح فيه المسلمين أضحية". وولا عيد بيكمل عنا بدون أكلات الاحتفالات اللي بنستناها من السنه للسنه. ومع إنو في كتير ثقافات بتخلي أحسن وأزكى وأغلى أطباقها للعطلات الدينية، بسإحنا عنا خلال الأعياد أكلنا كتير بسيط.
وفي أول وجبة فطور بعد شهر الصيام، بتتجمع العيلات المسلمة مع القرايب والصحاب لياكلو وجبة فطور كتير كبيرة، والغريب إنو جزء من السفرة بيكون مخصص لسمك الفسيخ المالح كتير، اللي بياكلوه الناس عشان يشربو مي كتير وعشان تتحمل معدتهم أكل المعمول.
بس بحلول عيد الأضحى بتتغير فكرة الناس عن الأكل، يعني بيصير الناس يفكرو أكتر بالفقراء وتوفير الأكل لإلهم. وبتكمل فرحتنا لما نطعمي العيلة والجيران والفقراء والمحتاجين. ولأنو هادا العيد بيصادف دبح الخرفان والعجول، فمعظم الأطباق اللي بنحضرها بتعتمد على اللحمة، وممكن الناس يصحوا من بكير عشان ياكلو معلاق الخروف المقلي.
والعادة المشتركة بين العيدين هي تحضير الكعك والمعمول، والحشوات اللي بتحضر منها هي الكعك هي بالتمر (اللي بنعتبرو النوع التقليدي الأصلي) والمعمول بالجوز والفستق، وأكيد الأنواع الثلاثة أزكى من بعض وبتتنافس ستات البيوت على تحضير المعمول بأزكى وصفه!
ومع أنو كل الأكلات والسفر بأنواعها خلال فترات الأعياد بتعتمد على الصحبة الحلوة والترابط الأسري، بس بيضل الهدف من الأكل بعيد الفطر هو الأكل بحد ذاته بعد شهر الصيام الطويل إللي بيوصل الصيام عن الأكل فيه لمدة ٢٠ ساعة باليوم في بعض الدول الأوروبية، إلا أنو عيد الأضحى بيكون الهدف منو هو دبح الخرفان وتوزيع اللحمة على المحتاجين.
