靚女
中文科 嘅 李 老師 喺 學校 入面 好 出名 , 因為 佢 係 唯一 一 個 短 頭髮 、 著 長褲 同 高踭鞋 嘅 女 老師 , 連 冇 俾 佢 教 過 嘅 學生 都 會 知道 佢 就 係 李 老師 。
佢 好 受 學生 同 家長 歡迎 , 個個 都 讚 佢 教書 教 得 有 心機 , 衣著 打扮 得體 , 斯文 得嚟 又 有型 。
李 老師 喺 教員室 入面 改 緊 功課 嗰陣 , 突然 笑 咗 一 聲 。 隔籬 位 嘅 陳 老師 見 佢 笑 到 面 都 紅 晒 , 就 問 : 「 睇 緊 啲 咩 咁 開心 呀 ? 」
李 老師 揞 住 個 嘴 , 笑 住 噉 話 : 「 頭先 收 嘅 作文 功課 係 『 我 的 志願 』 。
「 然後 有 個 女 同學 寫 佢 嘅 志願 係 要 做 一 個 靚女 !
「 佢 仲 話 等到 十八 歲 就 要 去 參加 香港 小姐 , 人細鬼大 …… 」
李 老師 望 住 自己 對 黑色 高踭鞋 , 繼續 話 : 「 其實 我 讀 小學 嗰陣 , 啲 頭髮 係 留 到 去 腰 㗎 , 因為 個個 大人 都 話 女仔 應該 要 留 長 頭髮 , 而且 女仔 十八廿二 嘅 時候 係 最 靚 嘅 。 嗰時 我 好 羨慕 隔籬 屋 嘅 大姐姐 可以 著 住 靚 裙 去 行街 , 我 仲 試 過 偷偷 哋 著 媽咪 嘅 高踭鞋 , 喺 屋企 扮 大人 噉 周圍 行 添 ! 但係 我 依家 嘅 諗法 唔同 咗 。 」
「 做 老師 成日 行行企企 , 著 高踭鞋 唔會 好 攰 咩 ? 」 陳 老師 問 。
李 老師 話 : 「 著 高踭鞋 的確 唔係 一 件 舒服 嘅 事 , 不過 我 指 嘅 唔係 呢 方面 。 我 覺得 , 唔只 十八廿二 , 其實 女性 無論 去到 咩 年紀 , 或者 點樣 打扮 , 都 一樣 可以 好 靚 。 我 鍾意 依家 三十三 歲 嘅 自己 , 多 過 當年 十八 歲 嘅 自己 。 」
陳 老師 反問 : 「 你 唔會 覺得 後生 嗰時 身體 好 啲 , 皮膚 望落 又 靚 啲 咩 ? 」
李 老師 話 : 「 講 外表 , 十八 歲 實 係 比 三十三 歲 青春 㗎 ! 但係 依家 成熟 咗 嘅 我 , 有 獨立 經濟 能力 , 亦都 比 以前 後生 嘅 我 有 智慧 同 信心 去 面對 唔同 難題 , 唔再 只係 識得 跟 其他 人 嗰 套 睇法 。 而且 我 比 以前 更加 識得 照顧 自己 同 其他 人 嘅 需要 。 呢啲 都 係 另 一 種 靚 嚟 …… 呀 ! 等 我 留返 個 評語 畀 同學 , 『 靚女 』 唔 一定 淨係 十八 歲 先 可以 做 嘅 …… 」