How Do I Save My Marriage?

مها: اهلا وسهلا نادية، تفضلي، شو هالمفاجئة الحلوة...شومالك؟ مبين عليك الحزن.

نادية: ايوة، انا بحتاج لمساعدة، انت الك متجوزة سبع سنين ومتهنية بزواجك، قوليلي شو بتسووا؟ انا يادوب الي متجوزة ست اشهر و انا وسمير صرنا معجبين عابعض، وبنتقاتل عاتفه الأشياء.

مها: آه، يا خسارة، قولولي، قديش بتقضوا وقت مع بعض؟

نادية: احنا دايما مع بعض لما بنكونش بالشغل. انا بعرف انو هذا مهم.

مها: هذا مهم، بس بجوز انتو بتقضوا وقت اكثر من اللازم مع بعض، والإشي البسيط اللي عادة مابزعجك بصير ماينطاقش، مرات حاولوا تبعدوا عن بعض، مثلاً بتقدري تزوري صديقاتك لحالك، ولما ترجعي عالبيت رح تستمتعي برفقة جوزك اكثر.

نادية: هذا معقول، كل وقتي بقضي مع سمير وأهملت حياتي الاجتماعية ... من زمان ماشفت صاحباتي، انا شو اشتقتلهم.

مها: روحي وزوريهم. خبريني، لسة بتمارسي هواياتك؟

نادية: لأ، من يوم ماتجوزنا، اهملت كل هواياتي، وهو كمان بطل يلعب كرة القدم والشطرنج مع اصحابو.

مها: مش لازم يصير هيك، لازم تستمروا تمارسوا هواياتكوا عشان هذا بساعد تنفسو عن حالكوا، وممكن تلاقوا هواية انتو الاثنين بتحبوها وتمارسوها مع بعض.

نادية: عندي فكرة، احنا الاثنين بنحب نلعب تنس، وممكن نلعب مع بعض.

مها: هاي فكرة ممتازة.

نادية: اشي ثاني بضايقني يا مها، هو دايما بنتقد الأكل اللي انا بطبخو، بقلّي انو طبيخي ملش طعم او مالح كثير او حار كثير...

مها: وكيف طريقة كلامو معاك؟

نادية: بحكي معاي دايما باستخفاف، بخليني اشعر اني بفهمش اي اشي، هو بقول انو صريح، وبدو صراحة بعلاقتنا. انا موافقة بس بتمنى لو براعي شعوري. واللي زاد الطين بلة انو امبارح اكل عند امو، ولما رجع صار يمدح بطبيخ امو، وهذا طير عقلي.

مها: طيب، المرة الجاي ذكري انو امو ماصرتش طباخة شاطرة بين يوم وليلة، وانو بتزعلي لما بقارنك مع حدا ثاني، اقترحي علي تتعلموا تطبخوا مع بعض واطبخوا اكل بتحبو، وبرضو ذكري انو يكون لطيف معاك وينتبه لنبرة صوتو لما يحكي معاك.

نادية: رح احكيلو هيك، اشي ثاني يا مها، سمير بشتري اشياء غالية وبصرف مصاري كثير من دون ما يوخذ رأيّ .

مها: مش لازم يعمل هيك، بتقوليولو انك بتحبيش هالإشي؟

نادية: ايوة، بقلّو "انت دايما بتشتري اشياء بدون ماتقلّي وبتحسبش ابدا حساب للمصاري".

مها: حاولي ماتستعمليش كلمات مثل دايما او ابدا، عشان هاي الكلمات بتجرح ورح يزعل منك قبل

ماتفهمي اللي بدك اياه.

نادية: معاك حق، رح احاول اتجنب هاي الكلمات، وكمان بقلّو "انت بتراعيش شعوري ولو مزبوط بتراعي شعوري لكنت اتصلت فيّ واخذت رأيّ ".

مها: افضل تقوليلو "بشعر انك بتراعيش شعوري" وهيك لما تستعملي كلمة بشعر رح يلاحظ انو جرح شعورك ورح يعاملك افضل.

نادية: ايوة، هذا معقول.

مها: لما تكونوا بمزاج منيح، احكوا مع بعض بصراحة عن الاشياء اللي انتو الاثنين بتتضايقوا منها، واتفقوا كيف تتجنبوها بالمستقبل.

نادية: هاي فكرة ممتازة، شكراً كثير عانصايحك.

مها: بأي وقت انا مستعدة.