خلينا نعزم اصحابنا
رامي: سعاد وينك؟
سعاد: أنا هون. ان شالله كان نهارك منيح في الشغل؟
رامي: اي. الحمدلله كتير منيح
سعاد: الحمدلله. بتحب توكل هلا؟
رامي: اي. أنا جوعان كتير. شو طبختي اليوم؟
عاد: اليوم طبخت اكلتك المفضلة كوسا محشي وورق عنب.
رامي: اي صارلي زمان ما اكلت هالاكلة. سلم ايديكي.
عاد: العفو. ما طبختو من زمان ميشان تحضيرو بياخد وقت كتير.
رامي: مزبوط بعرف.
سعاد: جارتنا ام باسم عرفت بدي أطبخ كوسا محشي اليوم فأعطتني ورق عنب من دواليها
رامي: فش اطيب من ورق العنب التازة.
سعاد: اي طبعاً.
رامي: ممتاز. بس ما قلتيلي.
سعاد: اي كنت بدي اعملك مفاجأة.
رامي: هي مفاجأة حلوة كتير. شكرا.
سعاد: العفو. شو رايك نعزم رانية وجوزها والولاد عالغدا يوم الجمعة الجاي.
رامي: اي ليش لا. وكمان صار لنا زمان ما شفناهن.
سعاد: اي صحيح.
رامي: طيب؛ سمعت عن مطعم جديد وبقولوا انو اكلو كتير زاكي.
سعاد: اي واحد؟
رامي: اسمو مطعم أبو فراس.
سعد : اجو عن اي واحد بتحكي. شفت دعايتو زيون.
رامي: اي. خبرني صاحبي ابو مازن اليوم انو اخد مرتو والولاد تلت مرات وكتير انبسطوا.
سعاد: اي حلو. وشو بقولوا عن الاكل؟
رامي: بقولوا انو اكلو بشهي وبنصحوا انو نجرب الجاج المشوي والكباب والشاورما.
سعاد: اي؛ هادا الاكل كتير زاكي. وبايش بتخصص المطعم؟
رامي: المطعم بتخصص بالسمك. عندن أنواع ممتازة كتير متل أطباق السمك المشوي أو السمك الحار.
سعاد: هيك شوقتني اروح.
رامي: المطعم كمان بقدم المازات السورية الشهية متل الفلافل والحمص والتبولة وسلطات منوعة.
سعاد: اي شي حلو كتير. وانا كمان اللي شوفت في الدعاية انو من مميزات المطعم: الديكور الحلو كتير ونوافير المية وانن بخبزوا الخبز هناك.
رامي: اي كلشي عندن تازة.
سعاد: وفي الدعاية بقولوا انو اسعارهن معتدلة
رامي: صحيح. أبو مازن قال نفس الشي.
سعاد: طيب. بدي اتصل برانية هلا واعزمهن عالمطعم الجديد يوم الجمعة الجاي.
رامي: كتير منيح وسلميلي عليهن.
سعاد: اوكي.
