ذكريات مؤلمة
السلام عليكم ورحمة الله وبركاته. اول شي بدي اعرفكن على حالي؛ انا اسمي رامي درويش انا مذيع بإذاعة بلدنا.
بدي احكيلكن قصة صارت من كم سنة بحمص؛ طبعا كلياتكن بتعرفوا حمص وما في حدا مو سامعين بها المدينة الحلوة الهادية الرايقة.
يلي صار بهداك اليوم انو العالم كانت طالعة لحتى تدفن شهداء ماتوا برصاصؤ ماتوا بالقنص. فبعد ما طعنا لحتى ندفن هدول الشهداء بنتفاجأ انو الأمن هاجم علينا وبدو يقوصناؤ لقينا حالنا شوي شوي عم نقول يا جماعة الإجتماع عند الساعة.
اجتمعت هالعالم والناس وبلشوا شوي شوي يكتروا وشوي شوي تيجي هالناس؛ شوي شوي تيجي هالنساوين وشوي شوي تيجي هالأولاد، ما لقينا حالنا غير صرنا حوالي الخمستلاف شخص وين؟ عند الساعة؛ وساحة الساعة زغيرة مانا كبيرة كتير.
هلأ في عالم كانت جاي تتفرج؛ ليش؟ لأنو هاي شغلة جديدة، انو عالم تعتصم وتقعد قال ويجيبوا فرشات ويمدولهن اياها عالارض.
فبعد ما كترت العالم. مشان ما يصير اختلاط ويصير غلط وقفنا النساوين على جنب؛ وقفنا نحن الشباب والرجال على جنب
طبعا حطينا حاجز بيناتنا هو حاجز عبارة عن قماشة يعني او لافتة. والنساوين واقفة وعم تهتف والرجال واقفة عم تهتف.
المهم اجا هالامن وحاصرنا وبلشوا يبعتولنا اخبار انو فضوا الساحة وعيب عليكن وهادا الشي اللي عم تعملو غلط. وبلشوا يبعتولنا اخبار انو فضوا الساحة وعيب عليكن وهادا الشي اللي عم تعملو غلط. بس نحن ما كنا خايفين نحن ما كنا خايفين.
بعد شوي بنلاقي بلش طرق رصاص بس عالخفيف؛ هون وقت لقينا القصة انو صارت خطرة حكينا للنسوان والاولاد انو انتو روحوا عابيوتكن.
بعد ما راحت النسوان بلشت الرجال تتحجج انو كمان نحن بدنا نروح.؛ "يا جماعة يا اخواتي يا حبايبي خليكن هادا اسمو اعتصام هادا مانو لعبة"؛ لأ بدن يروحوا؛ هاد اللي يقولك والله انا بدي روح غير تيابي وراجع. التاني يقولك والله انا بدي روح اتعشى وراجع. التالت يقولك والله انا بدي روح نم لي ساعتين وراجع
وبعد ما بلشت العالم تقل وبعد ما راحواء ابقينا تقريبا شي تلاتمية واحد؛ نحن هدول التلاتمية
واحد بهديك الليلة قررنا انو نحن قاعدين لحتى النظام يحقق مطالبنا.
بلش الرشء هلا هو الرش لأول ثواني كان الرش بالهوا؛ بعدين نزلوا عالعالم اللي واقفة بالساحة. هلا انا شوف عيني شفت العالم شلون عم بتهر عالارض شفت العالم شلون عم توقع شلون عم يوكلوا رصاص ويموتواء
منظر ما كان طبيعي؛ صرنا نهرب؛ صرنا نحاول ننقذ بعض. يلي ماتوا بهداك اليوم شوفت عيني كانوا قريب المية واحد.
الله يرحم شهداء مجزرة الساعة؛ وانا بأكدلكن انو باعتصام الساعة ما كان في اي قطعة سلاح مع اي انسان كان موجود. والشهداء اللي نزلوا كلن كانوا عزل؛ وكان من الممكن جدا اني كون واحد منن لكن رب العالمين ما اراد اني انا كون بين هالشهداء.
