Modern Egyptian Authors
ن: دي الوقتي عايزة أرجع لنجيب محفوظ. أنا قلت لكو من البداية ماينفعش نتكلم عن الأدب المصري من غير مانتكلم على نجيب محفوظ كثير. عايزة أقول انه هو بيعرض علينا المجتمع المصري، في القرن العشرين، أيام الثورة وبعد ذلك من خلال عايلة مصرية مثلا. ويعتبر نجيب محفوظ مش عارفة لو أنتو فاهمين قوي في الأدب الفرنسي بس ممكن نقول أنه يعتبر نجيب محفوظ البلزاك المصري. كان بيكتب ويعرض علينا الحاجات اللي بتحصل في المجتمع المصري. وطبعا مافيش حد زيه. بس حكلمكو على ناس تانية برضو كتبوا بطريقة جميلة و بطريقة مميزة بعديه. ممكن نذكر نوال السعداوي، وهي تعالج مشاكل المرأة المصرية. نوال السعداوي مهمة قوي عشان كتبت مش عن المجتمع المصري، عن المرأة المصرية. ودي حاجة مهمة قوي، ماكانش في ناس كثير بيكتبوا عن المرأة المصرية، عن وضع امرأة المصرية في الوقت ده وحريتها والحاجات اللي كانت بتحب تعملها والحجات اللي كان لازم تعملها كمرأة. فنوال السعداوي غيرت حاجات كثير في فكرة المرأة المصرية.
وقبل ما أخلص عايزة أذكر اسم مهم جدا بالنسبة لي واسم مش معروف لسه بدرجة عالمية يعني، بس إسم بالنسبة لي مهم: هو إسم علاء الاسواني. دي الوقتي في ناس كثير مش عارفين مين علاء الاسواني بس انا حشرح لكو هو مين و هو معروف ليه في مصر وفي العالم العربي. أول حاجة علاء الاسواني كتب قصة عمارة يعقوبيان في ألفين وأثنين، يعني من قريب، هو كاتب حديث ومصري واللي حبيته قوي في الكتاب بتاعه أنه بيكتب بطريقة بسيطة جدا. شوية زي نجيب محفوظ، يعني في نفس الفكرة ورا الكتابة بتاعتهم، أنه عايزين يدو فرصة للمصري العادي المصري اللي هو مش مثقف قوي، عايزين يدوا الفرصة للناس أنه يقروا و يقروا بطريقة بسيطة. فاللي حبيته في كتاب عمارة يعقوبيان كان بالعامية، يعني معظم الكتابة كانت بالعامية و بكدة كل الناس كان ممكن يقرو، ودي حاجة حلوة طبعا. وفي نفس الوقت حاجة بحبها في الكتاب ده أنه بيعرض علينا الحاجات المستخبية في المجتمع المصري، الحاجات اللي الموجودة بس مافيش حد عايز يتكلم عليها أو يشوفها. ده فعلا دور الكاتب. الكاتب لازم يوري الحاجات اللي ماحدش عايز يشوفها أو يتكلم عنها.
