Egyptian Arabic Podcast: Discipline and consistency in language learning SUBS (AR, EN, FR)

إيه الأخبار؟ أتمَنَّى تكونوا بِخير

و أهلاً بيكُم في الحَلَقَة التانية

النهاردَه أنا حابِب أتكَلِّم عَن

أوِّل قاعدَة عَشان تِنْجَح فِي تَعَلُّم لُغَة مُعَيَّنَة مِش بس العَرَبي

بَس أي لُغَة بِشَكل عام و هي حاجتين

الحاجتين دُول لِهُم عِلاقَة بِبَعض

أوِّل حاجَة هي الاِلتِزام و تاني حاجَة هي الاِستِمراريَّة

أوَّلاً أنا قَريت في بَحْث إنُّه

عَلَشان حَد يِتعَلِّم لُغَة مُعَيَّنَة بِيِحتاج إنُّه يِدرِس و يِسمَع اللُغَة دِي

على الأقَلّ مِن خُمسُمِية ساعة لِألف ساعَة

طَبعاً خُمسُمِية ساعة و ألف ساعَة ده رَقَم كِبير جدَّاً

و عَشان حَد يحَقَّق الرَقَم ده

بيِحتاج إنُّه يكُون عَندُه هَدَف كُل يوم

يَعني مَثَلاً لازِم أسْمَع اللُغَة كُل يوم على الأقَلّ نُص ساعَة.

على الأقَلّ

فَأنا بَنصَح طَبعاً لَو حَد يقدَر يسمَع ساعَة كُل يوم

دَه هَيكون مُمتاز جِدَّاً

أنا شَخصيَّاً بَعمِل كِدَه لَمَّا بَتعَلِّم لُغَة جديدَة

لَكن لَو ..يعني.. اِنتَ مَشغول جِدَّاً تِقدَر إنَّك تِسمَع اللُغَة نُص ساعَة بَس كُل يوم

و مُمكِن مَثَلاً في الويك إند تِسمَع مَثَلاً اللُغَة ساعَة

و عَلَى فِكرَة فِيه ..يَعنِي .. حاجَة ..

الناس بِتِفتِكِر إنُّه لازِم تكون مرَكِّز مِيَّة في المِيَّة و اِنتَ بتِسمَع

بتِتفَرَّج عَلَى فيديو أو بتِسمَع حاجَة في اللُغَة اللي اِنتَ عايِز تِتعَلِّمها

أنا شايِف إنُّه دَه غَلَط

دَه مش صَح

مش لازِم تكون مرَكِّز مِيَّة في المِيَّة

يَعني مَثَلاً لَو بتِسمَع الفيديو و اِنتَ بِتِمشِي

مَثَلاً ماشِي في الشارِع و رايِح تِشتِري حاجَة مُعَيَّنَة أو مَثَلاً سايِق العَرَبِيَّة أو كِدَه

أنا شايِف إنُّه دَه بَردو مُفيد

دَه مِش وِحِش

أيوة, الأفضَل إنَّك تِسمَع اللُغَة و اِنتَ مرَكِّز

بَس بَردو مُفيد إنَّك تِسمَع و إنَّك تِتفَرَّج على حاجَة في اللُغَة اللي اِنتَ عايِز تِتعَلِّمها

و اِنتَ مش مرَكِّز مِيَّة في المِيَّة

دَه بَردو هَيكون مُفيد

يَعني دَه حاجَة فِي وِجهِة نَظَري مش وِحشَة

فَحاوِل كُل يوم تخَصَّص نُص ساعَة بَس

نُص ساعَة بتِسمَع فيها اللُغَة أو بتِقرا

أو مَثَلاً دِلوَقتي فِيه عَلى فِكرَة..طبعاُ.. كُتُب صَوتِيَّة كِتير

و عَلى فِكرَة فِيه كُتُب صَوتِيَّة كَمان بِاللَهجَة المَصرِيَّة.

مِش عارِف فِيه كُتُب صَوتِيَّة أو لأ بِلَهَجات تانيَة زَيّ اللَهجَة مَثَلاً الشامِيَّة

مِش عارِف فِيه كُتُب صَوتِيَّة بِاللَهجَة الشامِيَّة أو لأ.

بَس مُمكن تِلاقي كُتُب صَوتِيَّة كِتير

و تِقدَر تِسمَع الكِتاب و تِقرا مَثَلاً الكِتاب أو البي دي إف في نَفس الوَقت

دَه بيكون مُفيد أوي لَو مُستَواك مُتَقَدِّم شوَيَّة

و حاوِل دايماً تدَوَّر عَلى سَواء فيديوهات أو أي حاجَة مُمتِعَة بالنِسبالَك

يَعني لازِم تكون مُمتِعَة بالنِسبالَك

يَعني مَثَلاً لَو أنا عايِز أتعَلِّم لُغَة جديدَة مَثَلاً .. أيَّاً كانِت اللُغَة

لازِم تدَوَّر عَلى حاجَة اِنتَ بتحِبّ تِتفَرَّج عَليها فِي لُغَتَك الأُم

يَعني مَثَلاً لَو واحِد بيحِبّ مَثَلاً فيديوهات بتِتكَلِّم عَن الرِياضَة و بِيِتعَلِّم دِلوَقتي عَرَبي

لازِم يِدَوَّر عَلى فيديوهات أو عَلى مُحتَوَى لِيه عِلاقَة بِالرِياضَة فِي العَرَبي

عَلشان يِكون مَبسوط و هوَّ بيِتعَلِّم اللُغَة

إنُّه بِيِسمَع حاجَة أو بيِقرا حاجَة هوَّ مُهتَمّ بِيها

فَدِي وِجهِة نَظَري و دَه على المَدَى الطَويل بِيكون مُفيد جِدَّاً

و أحسَن بِكتير مِن إنَّك

بَس تِفضَل تِقرا أو تِسمَع حاجات هِي بَس للناس اللي بتِتعَلِّم اللُغَة دِي يَعني

سَواء بتِتكَلِّم بَس عَن القَواعِد أو بِتِتكَلِّم .. القَواعِد اللُغَويَّة طَبعاً.. أو بَس بتِتكَلِّم عَن حاجات مُمِلَّة بِالنِسبالَك

أنا شايِف إنُّه دَه مِش مُفيد خالِص

لازِم تدَوَّر عَلى حاجات اِنتَ بِتحِبَّها في اللُغَة اللي بِتِتعَلِّمها

و عَلى فِكرَة فِيه ناس كِتير مَثَلاً بِتحِبّ تِتعَلِّم عَن طَريق مَثَلاً إنُّهُم يِسمَعوا أغانِي

و فِيه .. يَعني دَه خَبَر كوَيِّس .. إنُّه فِيه أغاني كِتير دِلوَقتي مَوجودَة عَلى فِكرَة مَع النَص بالعَرَبي

يَعني مَوجودَة مَع سابتيتلز بِالعَرَبي

فَدَه بِيكون بَردو مُفيد جِدَّاً و طَبعاً لَمَّا بِتلاقي كَلِمات جِديدَة مُمكن تِحاول تِتَرجِمها

أو مُمكن تِحاول تِسأل حَد عَن مَعنَى الكَلِمات الجِديدَة دِي

فَيَعني طَبعاً بِاختِصار الاِلتِزام هو أهَمّ حاجَة

لازِم كُل يوم عَلى الأقَلّ نُص ساعَة بتِسمَع اللُغَة أو بِتِقرا

مِش لازِم بتِسمَع بَس و طَبعاً الاِستِمراريَّة

لازِم تِكَمِّل ما يِنفَعش توَقَّف اللُغَة

لازِم تِكَمِّل على الأقَلّ سَنَتين أو تَلَت سِنين أو أربَع سِنين ..عَلَشان تِلاقي .. عَلَشان تِحِسّ بِالفَرق

لأنُّه عَشان تِحِسّ بِالفَرق بِتِحتاج وَقت

عَشان المُخ يِبدَأ يتعَوِّد عَلى اللُغَة دِي و تِبدَأ تِقدَر إنَّك تِتكَلِّم اللُغَة دِي بِطَلاقَة

أتمَنَّى الفيديو يكون عَجَبكو و شُكراً ليكو و أشوفكو الحَلَقة الجايَّة