Food - Lesson 9

عزيزتي أماني،

كيف حالك؟ مرق وقت طويل من آخر مرة شفتك فيها، بس أنا عنجد كنت كتير مشغولة بالوظيفة الجديدة اللي استلمتها بعمان. بتمنى إنك تكوني بخير ولساتك مستمتعة بترجمة الرواية.

السبب اللي خلاني أكتبلك هاي الرسالة هو إنو بدي أخبرك عن حفلة عشا يوم الجمعة 27 آب. رح تبدا الحفلة الساعة 6 وما فيها إشي مميز، بس رح نودع سلمى اللي رح تترك البلد لإنها لقت شغل بلندن. بتقدري تيجي؟ بنحب نشوفك انت وبنتك لارا. وعفكرة، في كتير من صاحباتنا القدام رح يكونوا بالحفلة إن شاء الله! ومحمد كمان رح يجيب بنتو، وهيك بناتكم بتسلو مع بعض. ورح أطبخلكم طبخة كتير مميزة (بس هادا سر!). ورح تكون الحفلة ببيت نورا بعبدون لإنو جنينتها كبيرة. وعفكرة، طالعين يوم الخميس نأرجل، تعالي معنا.

مش قادرة استنى اسمع منك! وبتمنى أشوفك انتي ولارا يوم الجمعة 27 الشهر. ووصلي لأهلك حبي.

كتير بحبك،

ديانا

هاي ديانا،

كتير مبسوطة إني سمعت منك وشكرا كتير عالعزومة. أنا متأكدة إنو حفلة العشا رح تكون بتجنن بس بدي أعتذر منك لإنو ما رح أقدر آجي. عنا عزيمة غدا مع العيلة هاي الجمعة وجايين ولاد وبنات عمي المسا. بس أرجيلة الخميس رح تزبط معي، أكيد رح آجي. خليني أعرف إزا رح تطلعو على مكان جديد ولا بدكم تروحو على الكافية الي بنلتقي فيه دايما. رح أطلع هايكنج مع المجموعة يوم السبت الجاي.

بدك تيجي؟ إزا الجو ما كان منيح أكيد رح يلغوا الهايك. بس أنا كتير نفسي أروح. على كل، بتمنى تكون حفلتكم روعة وإنك تقدري تيجي معنا.

أطيب الأمنيات،

أماني