Food - Lesson 4
سفرة مطعم أردني أصيل موجود بجبل عمان بشارع كتير مختلف اسمو شارع الرينبو. وبيقدم سفرة أكلات أردنية بدوية شهية مثل المنسف والصاجية واللوبيا بزيت الزيتون. المطعم إلو قعدتين وحدة خارجية ووحدة داخلية، قعدة الحديقة الخلفية كتير منسجمة مع التصاميم الداخلية لهاي الفيلا. وفي تباعد كافي بين الطاولات والمكان شرح. والتحف والقطع الفنية كتير بسيطة ولابقة مع كل الأجواء. يعني المكان بيعطيك طابع أردني حقيقي وفيه كتير نباتات مزروعة بقاوير فخار كبيرة على الطراز القديم المستخدم في البيوت والفلل الأردنية في حقبة الخمسينيات والستينيات. والإضاءة في المحل ساطعة لإنو الشبابيك طويلة على الطراز الفرنسي القديم. والإضاءة الداخلية بتتناسب مع البريق الخارجي إللي بصحي جواتنا الإحساس الأردني بالمكان، يعني الأجواء طبيعية وبتهدي الأعصاب. وبيعطي التصميم الفسيح والشكل الكلاسيكي للمطعم أجواء مريحة. ولما رحنا أنا ودلال عالمطعم اتفاجأنا بإنو ما في موسيقى فيه وأصلا ما احتجناها لأنو المساحة كتير غنية بأجوائها المميزة. وكإنو التاريخ عايش معنا لهلاء بألوانه وعبقه. وهالأجواء بتخلق تجربة ممتعة ومريحة كتير كتيير. وبسفرة، بتسمع أصوات طقطقة الكاسات والسكاكين وكمان صوت العصافير وحفيف الشجر. والمنسف اللي بيقدمة لزيز كتير لأنه اللحم عضوي والجميد صناعة محلية. وبقدموا الأكل بشكل حلو على الطراز الأردني وبصحون كبيرة. ويا سلام لو تدوقو المهلبية قديش خفيفة وطعمها معطر. مطعم جفرا موجود بوسط البلد بوحدة من العمارات الكتير قديمة في عمان. والمكان مسكر ومكنكن، ومعظم الأوقات مليان ناس وعجقة وضجة. وكل المحل تحف غريبة وقطع كتير حلوة وحتى الطاولة بتحسوها تحفة فنية. والمميز بجفرا إنه كل طاولة بتختلف عن التانية بحجمها وشكلها وتصميمها وكراسيها. والإضاءة في المكان خفيفة وفي برندة صغيرة فيها أكمن طاولة بطلوا عالشارع للناس اللي بحبو يقعدو في الهواء الطلق. يعني ببساطة، بتحس حالك وانت بجفرا جزء من التاريخ والحضارة والوطنية. وفي أول المطعم، في مكتبة للناس اللي بحبو القراءة. وعلى طول في موسيقى وأغاني قديمة وجديدة في المكان وفي كتير مرات ممكن تتصادف روحتك عجفرا مع فرقة موسيقية أو عازف عود أو ُمغني. والأكل اللي بقدمه جفرا عربي ريفي يعتمد على المناقيش والقلايات والمزات والسلطات وكتير بشبع وكمياته ممتازة. والناس اللي بتروح عليه بتدور على الأجواء الاجتماعية الحلوة والاكل الزاكي والاهتمام.
