Food - Lesson 1
المطبخ جزء مهم بحياة أي بيت عربي, معظم ستات البيوت بيقضوا نص يومهم بالمطبخ لأنو طبخاتنا بدها وقت طويل لتجهز ولأنو نوعية الطعام كمان كتير مهمة عند العرب وعشان هيك بنخزن كميات كبيرة من المواد الأساسية في كل بيت. وخزاين مطابخنا بتكون مليانه دايما. يعني تقريبا في عنا كل يوم في طبخة جديدة بكل بيت عربي. وطبعا, ترتيب المطبخ جزء مهم من مهام ست البيت العربية.
وما بيخلا أي بيت عربي من المواد الأساسية زي شوالات السكر وشوالات الرز, وقنينة الزيت, وتنكة زيت الزيتون, والمعلبات, والمربى, وتنكة الجبنة, و كمان الخبز, والبهارات المتنوعة.
والعرب بحبو ياكلو كل اشي بموسمه, مثلا, هلا بالصيف موسم الملوخية وورق العنب فبنشغلو ستات البيوت بطبخها بموسمها, وبتفريزها للشتاء. أما بالبرد, بيقضوا الستات وقتهم بعصر الليمون وتفريزه لرمضان عشان يعملو منو عصير ليمون لسفرة رمضان. وأكيد بعصروه بالشتا لأنه سعره أرخص بموسمه. وبيعصر العرب الزيتون بأول الخريف بعد ما تشتي عليه مرة وحدة وبحتفظوا فيه بالتنكات ليستعملوه طول السنه. يعني بالعربي, عنا الأكل كتير أهم من مجرد اشي بخلينا عايشين!
وكل يوم من الصبح بكير, بتصحى الأم وبتركض عالمطبخ عشان تحضر الفطور لجوزها وولادها, ودايما على سفرة الفطور بتلاقو لبنه وزيت وزعتر وجبنة بيضا وخيار وبندورة شرحات وشاي. وبالعادة, الشاي بكون بنعنع (للصيف) وبميرامية (للشتا). وباَخر الأسبوع يوم الجمعة تحديداً, لازم ننتفخ من أكل الحمص والفلافل والفول والفتة عالفطور!
وعالغدا, الطبخة ما بتزبط من غير جاج أو لحمة أو سمك مع رز وخضار. والمختلف بطبايخنا انو بنحب الطعم الغني وبنخلط نكهات متنوعة, يعني بنحط الرز مع اللحمة مع الخضار, ووحدة من الأكلات اللي كتير بنحبها واللي بنخلط فيها الرز واللحمة والخضرة اسمها المقلوبة.
وعلى عكس العائلات الغربية, العشا عنا مش أساسي أبداً, ودايما بكون متأخر ما بين الساعة ٩-١١ بالليل, ويا إنو بناكل مقالي, أو بنعيد سفرة الفطور, أو بنسخن الأكل البايت من الغدا. وأكيد عنا بين الوجبات سناكات خفيفة زي جاط فواكة أو طبق حلو! بتمنى نكون نقلنالكم عاداتنا الغذائية اليومية في البيوت العربية! ويعطيكم ألف عافية.
