Freedom of choice
البنت :امي راح توافقوا عالشاب اللّي تقدم لأختي سوسن ؟
الأم :مين ؟قصدك اخر واحد ؟
البنت :اه ،أنطوان ما غيره .
الأم :و انت مفكرة أنا و أبوك راح نوافق عليه ؟
البنت :و ليه ما توافقوا ؟الشاب كتير منيح و بيشتغل و معه مصاري و أهله كتير مناح و سوسن ...بتحبّه ،قصدي ،ارتحتله .
الأم :قليلها متبلّش تبني أحلام بالهوى ،أنا و أبوك ما راح انوافق عليه . و انتي بتعرفي ليه ،الاختلافات اللّي بناتهن راح تمنعهن و احنا ما بدنا المجتمع يطّلع علينا نظرة كره . هالمرّة إحنا اللّي راح نخترلها .
البنت :هههها ...تخترولها ! راح تخترولها ...هههها . هي متى اختارت ؟هي من أوّل خمس تواني اجت في هالحياة ...تخترولها ...اخترتولها اسمها و دينها و جنسيّتها ،حتّى المكان اللّي بدها تعيش فيه اخترتولها اياه . و لما كبرت و قرّرت تدخل التّخصص اللّي بدها إياه ،قلتولها هالتّخصص ما بيزبط للبنات و اخترتولها انتوا .
و لما قرّرت هلاّ تختار ،انتوا بدكن تخترولها ؟لأ . هي من حقّها تختار و من حقّي أنا اختار و من حقّ غيري يختار . بتعرفوا بمجتمعاتنا عندنا كل الحقوق و الحريّات . عندنا... حقّ الحياة و حقّ اختيار كل شيء بدك اياه و حقّ التّعبير عن الرأي، الرأي.
بس لما بدك تجي اطبّقهن راح يكونوا مجرّد حبر على ورقة. ليش؟ لأنّه المجتمع راح يوقّف ضدّك و أهلك و. العادات و التقاليد، كل هدول، اااااه ه... راح يربطوك... ما راح يخلوك تعرف تعمل اشي. راح تكون مجرّد عصفور جوّه قفص ...حطّيلوا ميّ و أكل ،بسّ يا حرام ،محروم من اشي واحد ،محروم من حقّ الاختيار .
كلمات الأغنية
عم يبدى العدّ العكسي من بعد الانتظار
قرّر عن نفسي بنفسي بإيدي بآخد قرار
اخلق من حزني و يأسي من حبسي الانتصار
كسّر حيطاني و شمسي بضوي عتم المدار
و بعيش حياتي لأول مرّة حلوة و سعيدة
مجنونة حرّة لوحة ارسمها بإيدي
ما بندم عالماضي بندم عاللّي ما صار
دنيا شو الها معنى لولا الاختيار
دنيا شو الها معنى لولا الاختيار
