我 隱形 咗 啊 ！
你 覺得 呢個 世界 咩 最 好玩 ？ 係 緊張 刺激 嘅 電子 遊戲 ？ 鬥智鬥謀 嘅 中國 象棋 ？ 定係 有益 身心 嘅 跑步 游水 ？ 哈哈 ， 計 我 話 ， 最 好玩 嘅 係 伏匿匿 ！
你 諗 下 ， 伏匿匿 鬥智 又 鬥 力 ， 既 要 走 得 快 ， 又 要 匿 得 埋 。 畀 人 發現 嘅 時候 ， 要 第一時間 走佬 ； 未 畀 人 發現 嘅 時候 ， 就要 收起 呼吸 ， 郁 都 唔 郁 。 能 動 又 能 靜 ， 刺激 過 其他 遊戲 多多聲 。
講 係 噉 講 ， 雖然 我 係 伏匿匿 嘅 狂熱 愛好者 ， 但 我 次次 同 表姐 玩 都 輸 。 做 捉 人 捉 唔 到 ， 做 畀 人 捉 嘅 ， 唔使 幾 分鐘 就 畀 人 揾 到 。
唉 ， 有時 我 諗 ， 如果 我 識 隱形 就 好 喇 。
有 一 次 我 又 好 快 輸 咗 ， 忍唔住 講 咗 呢個 諗法 畀 表姐 知 。 佢 聽見 就 笑 住 話 ： 「 我 睇 過 一 部 小說 ， 主角 有 件 隱形 斗篷 ， 去 到 邊 都 可以 神不知鬼不覺 ， 睇嚟 你 係 想 要 呢 件 嘢 喎 。 」 佢 又 摸 下 我 個 頭 ： 「 你 唔使 唔開心 喎 ， 最多 我 下次 讓 下 你 囉 。 」
「 隱形 斗篷 ？ 竟然 有 啲 咁 勁 嘅 嘢 ？ 」 我 即刻 兩 眼 放光 ： 「 我 先 唔使 你 讓 我 ！ 我哋 要 堂堂正正 公平 競爭 。 你 等 我 揾到 件 隱形 斗篷 返嚟 ， 你 就 知 味道 ！ 」
想 揾 資料 要 點 做 ？ 梗係 去 圖書館 啦 ！ 第二 日 一早 ， 我 就 跑 去 圖書館 揾 一 大 堆 關於 衫 嘅 書 ， 啲 書 疊 起 上嚟 仲 高 過 我 。 我 每 拎 一 本 書 ， 都 要 伸 到 隻 手 好 長 ， 對 腳 又 要 趷 到 好 高 ， 仲 辛苦 過 行山 。 不過 嘻嘻 ， 有 咁多 書 ， 我 就 唔 信 揾 唔 到 傳說 中 嘅 隱形 斗篷 ！
揭 完 一 頁 又 一 頁 ， 原來 衫褲鞋襪 嘅 世界 好 大 ， 淨係 物料 ， 都 已經 十 隻 手指 數 唔 晒 ！ 毛冷 啦 ， 尼龍 啦 ， 棉 啦 ， 羊毛 啦 …… 剩係 我 而家 身上 著 嘅 ， 都 已經 三四 種 。 再 望 一 望 周圍 睇書 嘅 人 啲 衫 ， 研究 下 係 咩 質地 —— 有啲 分 到 ， 有啲 分 唔 到 。 真係 好 好玩 啊 ！
毛鬙鬙 嘅 叫 毛冷 ， 冬天 嗰陣 ， 媽媽 會 將 佢 親手 織 嘅 冷帽 同 冷手套 畀 我 戴 。 我 戴 上去 就 暖笠笠 ， 畀 風 吹 到 都 唔 覺 凍 。
好似 膠 嘅 係 防水 尼龍 ， 落雨 著 嘅 雨褸 就 係 用 佢 造 。 我 著 佢 喺 身 就 唔怕 落雨 ， 雨水 打 落 雨褸 只會 跣 走 。
滑 到 跣手 、 超 好 摸 嘅 係 絲綢 ， 媽媽 珍而重之 掛 喺 衣櫃 嘅 旗袍 ， 就 係 用 棗紅色 嘅 絲綢 造 。 哥哥 結婚 嗰 日 ， 媽媽 就 係 著 呢 件 旗袍 ， 高貴 又 優雅 ， 人人 都 話 好睇 。
硬繃繃 嘅 係 牛仔布 ， 隻 色 好似 天空 咁 藍 咁 靚 。 爸爸 有 條 十幾 年 嘅 牛仔褲 ， 著 上身 型格 又 舒服 ， 而且 好 襟 著 。
「 各位 讀者 請 注意 ， 圖書館 將 於 5 分鐘 後 停止 服務 …… 」
係 圖書館 嘅 關 館 廣播 ， 原來 已經 咁 夜 嗱 ！ 我 嗱嗱聲 執 好 啲 嘢 ， 跑 返 屋企 。 返 到 屋企 ， 表姐 問 我 揾 到 隱形 斗篷 未 。
「 暫時 未 ， 不過 我 揾 到 更加 好玩 嘅 嘢 ！ 」 我 諗 咗 諗 ， 又 話 ： 「 你 都 唔好 咁快 放心 住 ， 雖然 衣著 嘅 世界 好 大 ， 但 我 遲早 都 會 揾 到 隱形 斗篷 嚟 贏 你 ！ 」
嗰 晚 瞓覺 ， 我 發 咗 個 夢 ， 夢 入面 我 有 件 隱形 T恤 ， 著 上身 嘅 時候 ， 上身 同 手臂 都 會 隱形 ， 得 返 個 頭 、 手掌 同 下身 會 畀 人 見 到 ， 成 個 人 變 得 好 奇怪 ！ 我 周圍 跑 ， 周圍 跳 ， 又 伸手 穿過 自己 身體 ！ 哈哈哈 ， 實在 太 搞笑 ， 太 好玩 喇 ！
我 笑 下 笑 下 就 笑 醒 ， 醒 咗 都 仲 繼續 攣弓 蝦米 噉 笑 。 摺 緊 衫 嘅 媽媽 走嚟 問 我 咩 事 咁 開心 。
「 哈哈哈 ， 我 隱形 咗 啊 ！ 」
