BLOGG MICHAELS

Föstudagurinn 25. mars

Hæ!

Ég heiti Michael. Ég er frá Berlín. Ég ætla að segja ykkur frá daglegu lífi mínu hérna á Íslandi. Ég er skiptinemi við Háskóla Íslands og er að læra íslensku og sagnfræði.

Á virkum dögum vakna ég venjulega klukkan hálf átta. Fyrst fer ég í hressandi sturtu og svo borða ég morgunmatinn minn. Venjulega borða ég morgunkorn og fæ mér svo appelsínusafa og kaffi.

Síðan hjóla ég í skólann (það er stundum erfitt út af veðrinu!) til að fara í fyrsta tíma sem byrjar venjulega klukkan korter yfir átta. Eftir skóla, klukkan tólf, hjóla ég svo heim. Ég bý hjá ungu pari í miðbæ Reykjavíkur. Þau heita Edda og Valur og hundurinn þeirra heitir Gréta. Þau eru öll mjög hress, líka Gréta. Það er alltaf fjör á heimilinu. Við búum á þriðju hæð í gömlu húsi.

Í hádeginu er ég yfirleitt orðinn mjög svangur og fæ mér oft samloku og te í hádegismat. Eftir hádegi legg ég mig. Þegar ég vakna aftur fer ég út í búð að kaupa í matinn og síðan hjóla ég aftur í skólann til að vinna heimavinnuna. Hérna sjáið þið mig til dæmis vera að skrifa ritgerð í sagnfræði í tölvuveri Háskólans. Stundum þarf ég að fara á Háskólabókasafnið til að leita að bókum fyrir heimildavinnuna.

Svo tek ég mér auðvitað pásu og hitti skólafélaga mína. Við fáum okkur kaffi og spjöllum saman. Þegar ég er búinn með heimavinnuna fer ég aftur heim og slappa af. Þá fer ég í sund og sit i heita pottinum. Það er ótrúlega notalegt! Um klukkan átta borða ég venjulega kvöldmat. Ég fæ mér oft hamborgara eða fisk með kartöflum. Mér finnst ekki gaman að elda og vaska upp. Þess vegna elda ég bara einfaldan mat sem tekur ekki langan tíma að búa til.

Á kvöldin horfi ég á sjónvarpið, leik mér við hundinn Grétu og spjalla við fólkið sem ég bý hjá. Stundum fer ég út með vinum mínum á lítinn pöbb og fæ mér bjór. En skólinn bíður svo næsta morgun og ég fer að sofa um miðnætti – mig dreymir íslenska kind! Jæja, ég kveð ykkur núna.

Bestu kveðjur,

Michael.

P.S.: Ég læt hérna fylgja uppskrift að fiskréttinum sem ég bý oft til. Hún er einföld og fljótleg!

Uppskrift Michaels:

Fiskflak (ýsa)

Salt

Vatn

Sítróna

Smjör

Kartöflur