017 Comparatio 3

Canis domino magna utilitate est, ovis maiore, bos maxima.

Magnus bello Persico Themistocles fuit neque minor in pace. Hannibal non minore gloria in re militari est quam maximi imperatores Romanorum. Scipio Africanus minor, filius Aemilii Paulli, a filio Scipionis Africani maioris adoptatus est. Mors honesta multo melior est quam fuga turpis. Lex brevissima optima est.

Iovem Romani optimum, maximum vocabant. Malum est peccatum, peior defensio peccati. Prima sententia saepe pessima est. Hannibal multas expugnavit, plures Alexander Magnus. Plurimae civitates Asiae Persis obtemperabant. Aves hominibus plus voluptatis parant quam utilitatis. A multis plus temporis otio datur quam operi. In gente Thebanorum plus virium corporis quam ingenii fuit. In Germania plura magna flumina sunt quam in Italia. Unus deus auctor plurium beneficiorum est quam universi homines. Complurium bestiarum opera homini est necessaria.

Italia antiqua divisa erat in Italiam superiorem et mediam et inferiorem; Italia superior etiam Gallia cisalpina sive citerior appellatur. Hispaniam citeriorem et ulteriorem Hiberus flumen separat.

In interiore parte terrae multa et pretiosa metalla sunt. Qui prior est tempore, potior est iure; qui posterior est tempore, deterior est iure. Tunica propior pallio.

Extremum oppidum Allobrogum est proximumque Helvetiorum finibus Genava.

Mors ultima linea rerum est. Etiam in intimis terrae tenebris plurimae res utilissimae sunt. In morbis corporis difficillimis medicus optimus, non deterrimus necessarius est. Gens nulla Gallica gente fama inferior est. Honorum gradus summis hominibus et infimis sunt pares.