مكتبة لا نهائية بها كل ما حدث وسيحدث؟! | النيرد العربي

أعرف أنكم راح تنصدمون أني راح أحكي قصة اليوم

عن كاتب مو عن عالم

ولكن اصبروا عليه

فهذه من المرات القليلة والرائعة

اللي يلتقون بيها الأدب ويا العلم

قصتنا اليوم عن خورخي لويس بورخيس

كاتب أرجنتيني راحل

ويمكن أشهر أديب في أمريكا الجنوبية كلها

هذا الرجل كان مولع بالقراءة

لدرجه أنه كان يحب يصف نفسه بأنه قارئ

أكثر مما هو كاتب

وحظه الجميل إنه اشتغل بنفس المجال اللي يحبه

وصار الأمين العام للمكتبة الوطنية في بوينس آيرس

كان يحب يفكر أفكار استثنائية

لها علاقة بالتناظر والتكرار واللانهائية

وبوحدة من قصصه فكّر

ليش ما يكون أكو مكتبة لانهائية

بيها كل الإبداع البشري اللي انكتب واللي راح ينكتب

يعني بيها كل شيء

بس الرهيب بالموضوع أنه هاي الفكرة رغم جنونها

فهي ممكنة التطبيق

بل هي فعلًا تم تطبيقها

شنو رأيك لو قلت لك أنه ماكو

أي شخص مبدع بالعالم كله

ما أحد يقدر ينتج أي فكرة جديدة

ولا يخلق أي عمل فني أو أدبي

إنما كل شيء إحنا نسميه إبداع

هو موجود مسبقًا في مكان ما في هذا الكون

والبشر فقط جاي يكتشفون أجزاء من عنده

ويدهلون منه

هاي الفكرة أنا أشوفها مخيفة

تتعارض ويا كل أفكارنا ومعتقداتنا عن هذا العالم

ولكن هي حقيقية إلى حد ما

هاي الفكرة فكرة المكتبة الكلية

هي مو جديدة ولا أنا اللي مبتدعها

فلطالما فكر البشر بمحدودية الإبداع البشري

وخصوصًا اللغوي

فكل اللغات بالعالم بيها عدد محدود من الحروف

والعلامات الترقيمية

وبالتالي أكو عدد محدود من الأشياء

اللي نقدر ننتجها من هاي اللغات

إيه مثل ما سمعت محدود بس كثير جدًا

حتى نوضح شلون هو محدود وكبير جدًا بنفس الوقت

خلنا نشوف شلون وصف إلنا

الكاتب الأرجنتيني خورخي لويس بورخيس هذه الفكرة

من عام 1941 نشر قصة قصيرة اسمها مكتبة بابل

بهاي القصة الجميلة يوصف بورخيس

الكون على أنه مكتبة لانهائية تقريبًا

موجود بيها كتب مكتوبة باللغة اللاتينية

متكونة من 25 حرف ورمز وبدون أرقام

المكتبة هذه متكونة من غرف سداسية الأضلاع

أربعة من هاي الضلوع بيها خمس رفوف

وكل رف بيه 32 كتاب متطابقات بالترتيب

فكل كتاب بيه 410 صفحة

وكل صفحة بيها 40 سطر

وكل سطر بيه 80 حرف أو رمز

يعني بكل كتاب أكو 1,312,000 حرف

بما أنه عندنا 25 حرف يعني العدد الكلي للكتب

هو 25 أس 1,312,000 كتاب

مملوئين بكل التركيبات الممكنة من هاي الحروف

عدد كبير جدًا بشكل ما نقدر تصوره

أكبر من عدد الإلكترونات والبروتونات والفوتونات

بالكون كله

ولكن حسب ما يقول بورخيس صحيح هو عدد كبير

بشكل ما يمكن تخيله

ولكن هو مو نهائي

فهاي المكتبة الخيالية إن وجدت

راح تحتوي على كل تركيب ممكن من الحروف اللاتينية

يعني بيها كلشي ممكن ينقال وينكتب

بيها سبب موتك وطريقة ولادتك

وكل النكات التافهة مال صديقك

وكل الأعمال الأدبية بكل أنواعها

اللي انكتبت وممكن تنكتب

هاي المكتبة ظلت مجرد فكرة خيالية

بعيدة كل البعد عن الواقع

ومن المستحيل إنشاء هكذا مكتبة

ماكو زمان كافي ولا طاقة كافية بالكون كله اللي نعرفه

حتى ننشيء ولو ربع هاي المكتبة

ولكن طالب أدب مقارن اسمه جوناثان باسيل

قدر أنه يحول مكتبة بورخيس الخيالية إلى حقيقة

على الإنترنت

فسوى برنامج يولد كل التشكيلات الممكنة

من الحروف الإنجليزية

بالإضافة إلى المسافة والفاصلة والنقطة

يعني 29 رمز لغوي

ولكن باسيل ما قدر يسوي

نفس الوصف الخاص بمكتبة بورخيس

وإلا راح يطلع عنده المجموع الكلي

ما يقارب 10 أس مليونين كتاب

وهذا الرقم يحتاج هارد درايف أكبر من الكون كله

فكان الحل أنه يسوي خوارزمية تنتج الصفحات

لمن تبحث عنها وبعد ما تخلص من قراءتها

تنمسح تلقائيًا

وبالتالي ما يحتاج تخزن كل هاي الكتب

وفعلًا سنة 2015 أطلق باسيل

موقعه الإلكتروني على الإنترنت يمثل هاي المكتبة

وعدد الكتب اللي بيه كان 10 أس 46,777 كتاب

وهو أقل بكثير من 10 أس مليونين

لأن هو عدل على وصف بورخيس

ومسح الصفحات المتشابهة

ومع ذلك فعدد الكتب ضخم جدًا

وحظ أوفر أنك تلقى بيه شيء مفيد

لأن أغلبها هي حروف بدون معنى

والحلو بهاي الخوارزمية إنها تشتغل بالعكس

يعني إذا أنطيتها نص راح تنطيك رمز الصفحة

فمثلًا هنا بحثت عن قصيدة لشكسبير

باللغة الإنجليزية فهو قال راح تلقاها بهاي الغرفة

وبهذا الرف وهذا الكتاب وهاي الصفحة اللي قدامكم

مجرد التفكير بأنه هيك موقع موجود

هو فد شيء يخوف جدًا

فهذا الموقع يخلي التمييز صعب جدًا

بين الاختراع والاكتشاف

فلو كل شيء ممكن يبتدعه العقل البشري

موجود بهذا الموقع مسبقًا

معناته إحنا ما جاي نبتدع شي جديد

وإنما فقط جايين نستكشف لأن هو موجود مسبقًا

ومحدد من قبل هاي الخوارزمية

اللي جاي نسويه هو فقط إعادة ترتيب

لما هو موجود مسبقًا

هذا الموقع ممكن تلقى بيه سر سعادتك

سبب المشاكل بين زوجتك وأمك

والنسخة الإنجليزية من نص هذا الفيديو

وحتى التعليق اللي راح تكتبه بعد ما تخلص مشاهدة

وأيضًا كيفية نشأة هذا الكون

وشلون راح ينتهي

وحتى نظرية كل شيء

ولكن فرصة إنه تلقى أي واحد من هذول الأشياء

أو أي نص بسيط بيه شوية معنى

من خلال البحث العشوائي

في خضم هذا الكم الغير قابل للتصور من الكتب

هو إحصائيًا صفر

هذا الموقع هو وسيلة للتفكير

بمدى غرابة هذا الوجود

جوناثان باسيل قدر يسوي نفس هاي المكتبة

ولكن مال صور

تشتغل بنفس الطريقة

مكتبة بيها كل الصور الممكنة حسب أبعاد معينة

صورتك

صورة جدك العاشر

أو صوره لأي شيء تمامًا

ولكن ما راح تشوفهم أبدًا

لأن أغلبها مجرد ضوضاء من البكسلات العشوائية

فمن فكرة لكاتب أرجنتيني مولع بالكتب والمكتبات

إلى موقع رقمي يحتوي كل شيء

ممكن تنتجه اللغات البشرية

دليل حي على أنه أكثر أدواتنا تطورًا اللي هي اللغة

محدودة بحدود إحنا نفسنا اللي سويناها

وغير قادرين على تصورها أو فهمها أبدًا

الطريقة الوحيدة حتى تقدرون بيها هاي المكتبة

وتفتهمون شلون تشتغل

هو إنكم تزوروها بنفسكم

وتتصفحون بيها

أكيد الرابط مالتها وكل المصادر المتعلقة بيها

موجودة بالوصف