الجهبذ | من هو رئيس الأرجنتين؟ وماذا تعرفون عن دولة أبطال كأس العالم؟ (1)
مرحبا يا كوتش كفاح
أهلين مولانا
أهلين سيدي
العمى طارت الطابة لعند الجيران
هلأ بيشقوها
كمان مرة.. لك أخي
قلنا لكن آخر طابة
ما بقيان غير هاي
ما علينا
شوف يا كوتش كفاح
إنت أكيد مانك غريب عن الأوضاع بالبلد
الغلاء والكهربا ما فيه
ومازوت ما فيه والناس تعبانة
والقيادة بعتتني لعندك خصوصي
خير سيدي بأمرك أنا
إنت أكيد شفت كأس العالم
والله مقتطفات مولانا
يعني هيك ع الومى من بعيد
على هوا الكهربا إيمتى كانت تجي
المهم أكيد شفت كيف فوز المنتخب الأرجنتيني
خفف من معاناة الشعب
يللي عم بيعيش أزمة كبيرة
نزلوا ع الطرقات
فرحوا ورقصوا
خطي
إيه والله مضبوط يا سيدي
تمام لهيك إرتأت القيادة الحكيمة
إنه شعبنا كمان بيستاهل يفرح يا كوتش كفاح
وحملتك هاي المسؤولية
والقيادة ما قصرت للأمانة
لحقت بآخر لحظة
ودحشتنا ببطولة صغار الكسبة والحرفيين
يا سلام
وأول مباراة لإلنا راح تكون مع فريق
نقابة بياعين تماري الكعك والترمس
لهيك بدنا إياك تربح هاللقب
وتفرح القيادة والناس
إيه أربح إيه
يا سلام على الطاقة اللي عندك يا كوتش كفاح
شو الخطة يللي ناوي تلعب فيها؟
2-4-4 يمكن مولانا
يعني عندك أبو جمعة والراعي
وأبو سماح والدبلان خط دفاع أول
حلو
وقاسم وأبو ماجد وزكي ومكمور
خط دفاع تاني
وأبو نديم الملوي وسط
ودبس وزيت هجوم
دبس وزيت هدول لاعبين يا ابني؟
لا هو لاعب واحد سيدي
كنيته هيك دبس وزيت
طب البخاشيري وينه أنا مالي شايفه صحيح؟
البخاشيري والله اضطر ياخد محل أخوه
بدور الخبز
لإنه مرت أخوه عم تطلق
فهو نزل يوقف محل أخوه
كوتش كفاح
ناقصكن شي بالمنتخب؟
القيادة جاهزة من مجاميعه
والله شوفت عينك سيدي الملعب نشفان
يبسان تماماً
لازمه سقاية والله
ليش وين الماي؟
بسلامة خيرك سيدي
الشباب من عندك من فترة بالصيفية
إجوا داروا ماي السقاية
لعندكن ع الفيلا مشان يعبوا المسبح
آه
هاد ابني دودي
كان مشوب بده يتسبح شوي
فأخدنا الـ.. المهم
غيره يا ابني فيه شي تاني؟
لك لا تستحي قول
والله يا سيدي
يعني ما بدي كذب عليك
ما بتوقع نربح
له له
مولانا
شو هالحكي يا ابني بدك تخجلني قدام القيادة؟
الرواتب صار لنا 6 شهور ما استلمناها
ما أصلاً الراتب بيكفي اللاعب غدا يومين يعني
ولسه ما حكينا عن الطابات
طلبنا منهم معسكر تدريبي للشباب
أخدونا على بطولة الحارات الخلفية
باك ستريت بويز
يمكن اسمها
هاد لسه ما حكيت لك عن الملابس
وعن العناية الطبية وعن المرافق والحمامات
الله وكيلك اللعيبة ما عم يلاقوا ياكلوا
غذاء صحي ما فيه
هاي القيادة حاسبة حسابها
خد يا كوتش كفاح
هدول بيطلعوا شي كيليين برتقان بلدي
وزع لي إياهن ع الشباب اللعيبة
خليهن يبلوا ريقهن
ويجهزوا حالهن للبطولة
ما بتنربح إلا بالإرادة
حصراً
وحصة البخاشيري راحت عليه
أهلين وسهلين ومية مرحبتين
بنور العين حبيباتي وأحبائي
المتابعات والمتابعين
مئات الملاين حول العالم هاي إذا ما قلنا أكتر
تابعوا نهائي كأس العالم قطر 2022
شخصيات عالمية مهمة كتير
حضرت هالنهائي هاد
بس فيه شي بتوقع انتبهت له
وانتبهتوا له إنتوا كمان حمادة وسعاد
الرئيس الفرنسي ماكرون حضر النهائي التاني
لمنتخبه على التوالي
كان سانن سنانه بلكي بيربح
أخي قالوا لك أنا بعهدي تم ربح
كأسين عالم متواليين
شفناه عم يشجع ويتفاعل
وواسى إمبابي والمدرب دي شون
لما خسروا ونزل ع الملعب
والزلمة حتى يعني شارك بتوزيع
الميداليات
بس السؤال هو وين رئيس الأرجنتين؟
إذا ما بتعرفوه شوفوا صورته ليكها
اسمه ألبيرتو فيرنانديز
معقول ما حضر منتخب بلده
يللي ربح كأس العالم بعد 36 سنة انتظار
وكحل عيونه بمرأى ميسي وهو عم يشيل
يشيل
إيه شيل يا طويل العمر شيل؟
معقول يكون الرئيس الأرجنتيني ما له مهتم
بكرة القدم
ولا مهتم بحضور نهائي كأس العالم
اللي فاز فيه منتخب بلاده
بلاد التانغو؟
هل كرة القدم منفصلة عن السياسة
بالأرجنتين حقاً؟
بتوقع جواب السؤال التاني كتير واضح وبسيط
يعني معقول تكون كرة القدم
مرتبطة بالسياسة بأوروبا وأمريكا الجنوبية
يللي بتتنفس كرة قدم
تكون السياسة مو مرتبطة فيها؟
قيسها بالمنطق يا حمادة
ما شفتوا المشجعين الأرجنتينيين؟
هوس غريب بكرة القدم
وإجوا طرقوا مشوار من بلادهن على قطر
مع إنه تيكيت الطيارة غالية
بطاقة الطيارة حقها مصاري كتير
بس يا أخي بتحس الشعب الأرجنتيني هيك
قريب علينا
دراويش ومعترين وبسيطين هيك
دمهم حامي
بيشبهونا أكتر من الأوروبيين
صح وللا لا؟
فيه ناس كتير شجعوا المنتخب الأرجنتيني
كبلد إله تاريخ نضالي وكفاحي
وولد فيه المناضل الثائر التاريخي
إرنستو تشي غيفارا
بمدينة روزاريو
نفسها اللي ولد فيها ليونيل ميسي
حمادة ولد بالأرجنتين هو مو بكوبا
يعني ما بعرف صحح معلوماتك
إن كنت مفكر إنه هو ولدان بكوبا
هو ولدان بالأرجنتين
أين تقع الأرجنتين؟
الأرجنتين هي ذلك البلد الكبير نسبياً
طبعاً أصغر من البرازيل
ولكنه كبير
تحت البرازيل
شايفه؟
لا تشوفه هيك هاد كبير كبير يعني
عم تحكي إنت بحوالي
مليونين و700 ألف كيلومتر مربع
يعني قد مصر تقريباً 3 مرات
لكن عدد سكانه ما بيتجاوز 47 مليون نسمة
و90% منهن من أصول أوروبية
وخاصة يللي إجوا من إسبانيا وإيطاليا
لكن عدا عن هدول الـ 90%
عندنا أقلية من الميستيزو
يللي هنن الأوروبيين يللي تزاوجوا
مع السكان الأصليين
مارادونا مثلاً منحدر من هاي الأقلية
لأنه أبوه بيجي من السكان الأصليين
من الغواراني
وأمه من أصول إيطالية
تزوجوا وجابوا مارادونا
فمارادونا صار ميستيزو
وسنة 1994 لما رجع يلعب كرة قدم بالأرجنتين
بعد ما ثبت بمونديال أمريكا
في 1994 وكان عم يتعاطى منشطات
صار يتعرض لصيحات عنصرية من مشجعي
الفرق التانية
صاروا ينادوا له يا هندي قذر
أما ميسي فيعتبر من الغالبية الأوروبية الأصل
أجداده لميسي إجوا من إيطاليا
يعني ميسي متل غالبية الأرجنتينيين
حافظين نسبهم وشجرة العيلة
هيك لحتى يوصلوا لعند الجد الأول
يللي هاجر من أوروبا للأرجنتين
غرانت فارد الأستاذ بجامعة كورنيل الأمريكية
بيقول لك إنه الشعب الأرجنتيني
بيحس حاله متميز
عن البرازيليين وباقي أمم أمريكا الجنوبية
بيحسوا إنه عندهن صفاء عرقي
بيحسوا حالهن غير
لذلك بالذات بالمنتخب الأرجنتيني
ما بنلاقي لاعبين سمر متل باقي منتخبات
أمريكا الجنوبية
طب هل يا جهبذ بما إنه الشعب الأرجنتيني
معظمه من أصول أوروبية
هل هنن بيكونوا يعني عايشين
متل دول العالم الأول
وما عندهن نفس همومنا نحنا تبع الدول
المعترة بأفريقيا وآسيا؟
يعني مبسوطين؟
مرتاحين؟
زناكيل؟
أمورهم بخير؟
ها ها
جهز كاسة المتة وهيا بنا نقرقـ.. نتحدث
هلأ صحيح الأرجنتين بنهاية القرن التاسع عشر
وبداية القرن العشرين كانت من أغنى
10 دول بالعالم
وكان متوسط دخل الفرد فيها عالي
وكانوا المهاجرين يكفتوا عليها
من كل دول العالم
منهم حتى منطقتنا العربية
روحوا شوفوا حلقة التغريبة السورية اللبنانية
اللي حكيت لكم عليها
حتى
Qué Mira, Bobo?!
ولكن دوام الحال من المحال
والأرجنتين اليوم بتقوم من أزمة اقتصادية
بتوقع بأزمة اقتصادية تانية
نسبة الفقر فيها عالية جداً
حتى صارت بطلة العالم بالأزمات الاقتصادية
بشو بطلة العالم الأرجنتين؟
بالأزمات الاقتصادية
ليس فقط بكرة القدم
ومتل بكتير حالات يا حمادة
التدهور الاقتصادي بيكون فيه وراه
أزمات سياسية
وهذا التدهور يبدأ بالأرجنتين
بعد نهاية الحرب العالمية التانية
وبالتحديد عام 1946
عندما وصل خوان بيرون إلى رئاسة الأرجنتين
وعمل نظام بيوصفوه بإنه سلطوي وشعبوي
يمكن بيرون قال بوقتها
أخي بما إنه نحنا الأرجنتينيين
الدماء الإيطالية تسري في عروقنا
فيعني نحنا من باب أولى
نروح نستورد التجربة الفاشية
يللي فشلت بإيطاليا
ونجربها عندنا
موسوليني بشو أحسن مني؟
بلكي نجحت هون بعد ما فشلت هنيك
بيرون كان معجب فيها كتير
يا لطيف
لسه الأوضاع صارت أسوأ
فيه ناس بتترحم على أيام بيرون
مع إنه كان دكتاتور
على هوى يللي صار بعدين
يا لطيف
بيرون مات سنة 1974
وبعده بسنتين بلشت أسوأ حقبة
بتاريخ الأرجنتين
تسمت هالفترة بالحرب القذرة
La Guerra Sucia
هالحرب هاي شنها المجلس العسكري
اللي استلم السلطة سنة 1976
على المعارضين لحكمه
اعتقال وتعذيب بسجون سرية
وقتل ودفن بمقابر جماعية
أو حتى رمي الجثث بالبحر
وأهالي الضحايا ما بيعرفوا شي
عن مصير ولادهم
9 آلاف معتقل أعدموا بهاي الطريقة
سكتوا الإعلام وهددوا الصحفيين
وجيل كامل بالأرجنتين ربي على فكرة
إنه الحيطان إلها آذان
وكل هاد صار مع ركود اقتصادي
ومستوى المعيشة متراجع بسبب التضخم
وفوقها خسرت الأرجنتين حرب جزر الفوكلاند
مع بريطانيا
إيه مو النظام العسكري الأرجنتيني قال
بدو يلهي الناس عن مشاكلهم الاقتصادية
بهاي الحرب
إيه راح خسرها وطلعوا الناس عليه مظاهرات
هيك لحتى سقطوا النظام
عال عال
خي معناتها تحسن الوضع بالأرجنتين يا جهبذ
لا والله يا سعاد
بعد ما راحوا العسكر
انتخبوا الأرجنتينيين رئيس جديد اسمه
راؤول ألفونسين
ظلت الأرجنتين بعهده عم تعاني
من المشاكل الاقتصادية
تضخم كبير وديون خارجية كتيرة
والجيش كان عم يضغط على الحكومة المدنية
ويحاول يمنعها من مقاضاة ومحاكمة
كتير من القادة العسكريين يللي عملوا بلاوي
بفترة حكم العسكر
يعني بالمحصلة عقد التمانينيات
كان عقد صعب ع الأرجنتينيين
لو ما تم جبر خاطرهم بحادثة غريبة
الأرجنتينيين ومارادونا فازوا بكأس العالم
سنة 1986
خاصة فوزهن على إنكلترا
حسوا إنه رجعت لهم شوي من كرامتهم المهدورة
بحرب الفوكلاند
La Guerra de las Malvinas
متل ما بيسموها الأرجنتينيين
حسوا فوزهم على إنكلترا كانتقام لألهن
مارادونا لما حط الغول الشهير بإيده ما اعتذر
حس كأنه عم ينتقم لبلده من بريطانيا
وقال إنه إذا بينعاد الزمن بيرجع بحط الغول
بإيده مرة تانية
الشاعر الفلسطيني الكبير الراحل محمود درويش
خلد هالحادثة بنص نثري قال فيه عن مارادونا
وقال عنه كمان
وبمعلومك حمادة الشعوب المقهورة
تستعيد ما خسرته في ميادين السياسة
والمعارك الحربية والعسكرية في الملاعب
كرة القدم
ويعني الحمد لله نحنا يعني
لا معارك وميادين وسياسة
ولا كرة قدم
المهم بآخر التمانينيات
اللي كان عقد مليان متاعب ومشاكل اقتصادية
إجا رئيس جديد والناس كانت عاقدة
آمالها عليه
هالرئيس هاد هو كارلوس منعم
يللي أصوله من مدينة يبرود بسوريا
بمنطقة القلمون
أكيد يا جهبذ هاد اللي أنقذ الأرجنتين
لا
منعم هاد لحق موضة التسعينيات
وصار يخصخص مؤسسات الدولة
وهالشي كان يعتبر تغيير جذري بالأرجنتين
حتى بيقولوا إنه منعم ما حافظ على شي
من تراث يللي سبقوه من الرؤساء
إلا المحسوبيات
هاد قرايبنا
هاد من حبايبنا
جيبوهن لنسلمهن مناصب
صحيح إنه سياسات منعم الاقتصادية
أدت لإنه يتنعنش الاقتصاد الأرجنتيني
بعد الأزمة اللي كان فايت فيها بالتمانينيات
بس هالسياسات أدت كمان إلى ازدياد
غنى الأغنياء
وازدياد فقر الفقراء في الأرجنتين
يعني صار فيه استثمارات ورجال أعمال
والذي منه
بس البلد كان ماشي باتجاه الهاوية
وفعلاً بالنهاية وصل البلد على الهاوية
بعد ما راح كارلوس منعم
وصارت الأزمة الاقتصادية الشهيرة بالأرجنتين
الأزمة الخانقة تبع الـ 1998 للـ 2002
واضطرت الأرجنتين بوقتها تعلن إفلاسها
ونزلت مظاهرات كتيرة واحتجاجات واسعة
من الشعب إلى الشوارع
وراح ضحايا كتير
خاصة بعد ما فقد البيزو الأرجنتيني
ثلثي قيمته
وبعد ما منعت الحكومة الناس يسحبوا
مصاريهم من البنوك
متل اللي عم يصير بلبنان وسوريا مثلاً
العالم تعبانة ومعدلات الناس اللي عايشين
تحت خط الفقر كل مالها عم تزداد
والشباب عم يحملوا حالهم
ويتركوا البلد ويسافروا
ورفعت المظاهرات بنهاية الـ 2001
بداية الـ 2002 شعار
Que se vayan todos
بمعنى فليرحل الجميع
وهالشعار بيذكرنا بشعار المظاهرات
اللي طلعت بلبنان سنة الـ 2019
يللي بتقول كلهن يعني كلهن
يعني قصدهم كل السياسيين بالبلد يرحلوا
ومتل ما صار بلبنان صار بالأرجنتين
ما رحل حدا من السياسيين
وما صار التغيير الجذري يللي كانوا يحلموا فيه
الثوريين المتحمسين الحالمين
وما بلش يتحسن الوضع بالأرجنتين
إلا مع وصول الرئيس الأرجنتيني الجديد
نيستور كيرشنر سنة الـ 2003
إلى سدة الرئاسة والحكم في الأرجنتين
كيرشنر أول ما إجا قال الفرق بيني وبين
كارلوس منعم كبير
وفعلاً منعم كان من جماعة الخصخصة
والنيوليبرالية والعلاقات القوية مع أمريكا
أما نيستور كيرشنير
وبعده زوجته
كريستينا فرنانديز دي كيرشنر
اللي استلمت الرئاسة بعده
فكانوا محسوبين على اليسار الاشتراكي أكتر
شو يعني؟
يعني بيعطوا دور أكبر للدولة بالاقتصاد
الباحث والأكاديمي الألماني
إنغو روهرر
بيقول لك إنه الكرشنرية تبع نستور
ومرته كريستينا
ما هي إلا جزء من ظاهرة أكبر
كل ما لها عم تتنامى وعم بنشوفها أكتر
بأمريكا الجنوبية
وهي التوجه أكتر نحو اليسار والاشتراكية
الاقتصادية وتعزيز الشراكة الاقتصادية
مع دول أمريكا الجنوبية
قال لهن يا جماعة الخير
بدال ما كل بلد منا أكبر شريك اقتصادي
إلها هو أمريكا
تعوا نشتغل بين بعضنا ويا دار ما دخلك شر
وأنا وأخي على ابن عمي
وأنا وابن عمي ع الغريب
ولكن للأسف التحسن الذي شهدته الأرجنتين
مع الرئيس كيرشنر وزوجته ما طول
ورجعت حليمة يعني الأرجنتين
لعادتها القديمة وهي الأزمات
الاقتصادية الكبيرة
هلأ الرئيس الحالي اسمه
ألبيرتو فيرنانديز متل ما قلنا
بس مين نائبته؟
مين؟
نائبته هي الرئيسة السابقة
كريستينا فرنانديز دي كيرشنر
اللي حكينا عنها قبل شوي نفسها
وكتار بيشوفوها إنه هي الرئيسة الفعلية
للأرجنتين اليوم
أو بأحسن الأحوال عم تنافس
الرئيس الحالي مين بدو يمشي كلمته
على الأرجنتين بهالفترة الصعبة
اللي عم تمرق فيها
طيب والأزمة الاقتصادية يا جهبذ
شو عم بيعملوا لحتى يحلوها؟
للأمانة الكثير من التصريحات والخطابات
يا شعبنا العظيم نحن معكم في خندق واحد
في وجه الأوغاد من الأغنياء
يللي عم يسرقوا قوت يومكم
وياخدوا مصاريكن نحنا معكن ضدهن
والله لا يوفقهن
المشاكل اللي أكلت البلد
لا لا مو بسببنا ولا بسبب الحكومة
لكن بسبب العصابات الإر.. لا هداك غير بلد
بسبب التجار الجشعين والطماعين الذين
لا يكتفون من قوت الناس
تخيلوا إنه رفعوا يعني كيلو المتة صار
