Uzi Jutubon por lernado
Preskaŭ ĉiu dua lernanto en Germanio uzas Jutubajn filmetojn celite por lernado. Tion montras nova studaĵo. Samtempe multaj enketitoj deziras kritikan pritrakton de la videoplatformo en la instruado.
Nova reprezenta studaĵo el Germanio montras ke preskaŭ 90 procentoj de la gelernantoj ĝenerale uzas la videoplatformon. Pli ol la duono el ili konsideras jutubajn filmetojn gravaj aŭ tre gravaj.
Laŭ la studaĵo gelernantoj spektas klarigajn filmetojn precipe tiam kiam ili volas ripeti enhavojn el la lerneja instruado. Ankaŭ por hejmaj taskoj, hejmaj laboraĵoj aŭ por skribaj ekzamenoj filmetoj estas aparte ofte aplikataj. La kaŭzo estas: Ĉiu tria lernanto indikas ke jutubaj filmetoj povas klarigi enhavojn pli kompreneble kaj pli memorigeble ol geinstruistoj. Krome oni povas spekti la filmetojn laŭdezire ofte.
La studaĵo tamen ankaŭ montras kiam gelernantoj atingas limon en la lernado per filmetoj: Granda parto de la enketitoj aprezas en la lerneja instruado ke ili tie povas redemandi se ili ion ne komprenas.
La lernado per Jutubo okazas kompletige al la lerneja instruado, ne kiel anstataŭaĵo, diras pedagogia profesoro de la universitato de Erlangen-Nürnberg: "Jutubo estas intertempe ankaŭ signifa pedagogia aganto per kiu lernantoj preparas sin por ekzamenoj aŭ povas profundigi scion. Tio ŝangas la manieron kiel lernantoj lernas kaj alprenas enhavojn". Per la filmetoj la lernantoj havas rektan kompareblecon kun la instruistoj.
Entute 60 procentoj de la enketitaj uzantoj de Jutubo indikas ke ili volas kritikeme okupiĝi pri la videoplatformo en instruado. Sendepende de aĝo kaj sekso la gejunuloj deziras priparoli la avantaĝojn kaj malavantaĝojn de la platformo. "Gelernantoj kompreneble devas lerni ĝui filmetojn singarde kaj kontroli la fontojn", diras la profesoro. "Aliflanke ankaŭ instruistoj klarigu: Ciferecigo ofertas multajn ŝancojn kaj eblecojn, ne nur por gelernantoj, sed ankaŭ por geinstruistoj. Tion ni konsideras ĝis nun multe tro malofte."
Laŭ la studaĵo gejunuloj ŝatas spekti jutubajn filmetojn aparte volonte se ili estas "distraj", "spritaj" kaj "novaj/laŭepokaj". Por la profesoro tio montras: "Instruistoj ne bezonas fariĝi pli spritaj ol retaj filmetoj, ĉar la gejunuloj ŝatas la interagon kun la geinstruistoj. Se ekzistas eblecoj prepari temojn por esti distraj, tiam oni uzu tiujn eblecojn."
Jen pluaj rezultoj de la studaĵo: Jutubaj filmetoj motivigas enketitojn mem aktiviĝi artiste. La filmetoj vekas scivolemon, ili entuziasmigas kaj motivigas. Nur ĉe malgranda parto de la enketitoj (8 ĝis 10 procentoj) tio ne trafas.
Ĉe la elekto de filmetoj la enketitoj konsideras je 91 procentoj rekomendojn de amikoj, je 65 procentoj rekomendojn de retaj influantoj, je 44 procentoj konsilojn el la familio, je 30 procentoj konsilojn de instruistoj.
Por 26 procentoj de la enketitoj lernejo kaj Jutubo ne interrilatas. Precipe pli aĝaj gejunuloj kaj junaj plenkreskuloj laŭ tio vizitas aparte ofte la videoplatformon: Laŭ la enketo ĉirkaŭ du trionoj de la 12- ĝis 13-jaruloj uzas Jutubon, de la 18- ĝis 19-jaruloj estas pli ol 90 procentoj.