Shopping seasons
المرأة: ...في عَِّنا مَوسِم لمَّا بِدُّو الوَاحَد يرُوحْ يِشترِي مِثلاً للمَدَارِس، يجَهِز للمَدارِس لِبِسْ ولىَّ بِدُّو يْجَهْز لَعِرِس ولىَّ لَحَفلِة ولىَّ لأشِي بِدُّو يرُوح على مثلاً أول إشي المَحَلات إلِّي في البَلد عِنَّا. بِرُوح على المحلات إلّي في البلد بِشُوف إذا لاقى إشي يِعجِبُوا، بلاطين، بلايز، كنادر، إشي، أعجبوا الوضع في البلد عَِّنا بشتري، بِرُوح بِركَب في السَّيارة وبِنزل وين على مَدينة نَابلِس عَِّنا. هاي في سُوق كبير بكونوا إيش مَليَان كُلَّيَاتوا بضَاعَة جاي... يعني معبى السوق بضاعة، وين، مفروده على عَرَبَايَات، في الشَوَارِع، عَلى علاقات، على إشي مفروده بتكون زي free market عندكم يعني. فهاي بتكون سِهلِة للواحد إنُّو يختار إلِّي بدو إياه. بكون كل إشي مبين قداموه، وبتسوَّقوا من المدينه. إحنا بقولولها بطلع الواحد من القرية بروح على المدينة بشتري اللبِس إلِّي هو بِدُّو إياه، بَرضُوا الأكِل إلِّي بِدَُّ إياه بكُون مِتوَفِر بشَكِل كبير. بِكُون في المدينه عَادةً كُلْ أصنَاف الفواكه، كل أصناف الخُضار، وكل أنواع اللبِس المَوجوده بتكون هاي موجوده في المُدن. إلِّي هي في مدينة نابلس أو جنين أو في مدينة رام الله. هاي هي المدن الكبيرة بتكون مِتوَفِر فيها كُل إشي. وبشترِي الواحد البضاعة إلِّي بِدُّو إياها أكثر إشي تجهيز بصير عَِّنا على فتوح المدارس. البنُات بشترين جهازهِن إلِّي هي مريول المَدرَسة المَعرُوف عِنَّا، زِيّ خاص، بنطلون أسوَد والشَّالة بتكون لُونها بيضه. وبشتروا الشُنت والقرطاسية، الأقلام، الدفاتر، والكنادر، والبوات، وبدخّلُوهم المَدارِس. هاي أوَّل السَّنة بتكُون عَِّنا كل البلاد بتجهّز لهذا المَوسِم.